ජාවාරම් මත ගොඩනගා ඇති කළු ආර්ථිකය අවසන් කිරීමට සහතික වන බවත්, මහජන මුදල් ආරක්ෂා කිරීම සඳහා නීතිමය වශයෙන් වගවීමේ පද්ධතියක් ස්ථාපිත කරන බවත් ජාතික බදු සතියේ සමාරම්භක උත්සවය අමතමින් ජනාධිපති අනුර කුමාර දිසානායක පැවසීය.

මහජනතාවගේ සෑම රුපියලක්ම ආරක්ෂා කරගැනීම සඳහා ජනාධිපතිවරයා ලෙස තමාගේ වියදම් හැකි සෑමවිටම අඩුකර ඇති බව ජනාධිපති ලේකම් කාර්යාලයේදී පැවැත්වු උත්සවයට සහභාගීවෙමින් ඔහු පවසා සිටියේය.

බදු මුදල් සම්පූර්ණයෙන්ම ආරක්ෂා කරන බවත්, යමකු එය අනිසි ලෙස භාවිත කරන්නේ නම් නීතිමය ක්‍රියාමාර්ග ගන්නා බවත්, ඔහු අවධාරණය කළේය.

සියලුම පුරවැසියන්ගෙන් බදු ගෙවන ලෙස ඉල්ලා සිටින අතර ගෙවන සෑම රුපියලක්ම ආරක්ෂා කරන බවටද ජනාධිපතිවරයා සහතික විය.

ඩිජිටල්කරණය ඔස්සේ රාජ්‍ය සේවාවන් සහ එහි විනිවිදභාවය වැඩිදියුණු කරන බවත්, රාජ්‍ය ආයතන තුළ මුල් බැසගත්, අන්තර් සම්බන්ධිත මූල්‍ය අපයෝජන ජාලය අවසන් කළයුතු බවත්, මෙම ව්‍යුහය බිඳදැමීමට අපොහොසත් වුවහොත්, රට අඟලක්වත් ඉදිරියට නොයනු ඇති බවත් ජනාධිපතිවරයා සඳහන් කළේය.

බදු වාර්තා ඉදිරිපත් කිරීම සඳහා දේශීය ආදායම් දෙපාර්තමේන්තුවේ මාර්ගගත වේදිකාව ද මෙම උත්සවයේදී නිල වශයෙන් දියත් කරන ලදී.

“බදු ශක්ති” ලෙස නම් කර ඇති මෙය ලබන (07) දින දක්වා ක්‍රියාත්මක වන අතර, 2024–2025 තක්සේරු වර්ෂය තුළ මහජනතාව දැනුවත් කිරීම සහ බදු අනුකූලතාව වැඩිදියුණු කිරීම මෙහි අරමුණු වේ.