මධ්‍යම තැපැල් හුවමාරුවේ එකතු වූ තැපැල් භාණ්ඩ හමුදා බස් රථ භාවිතයෙන් විවිධ ප්‍රදේශවලට ප්‍රවාහනය කර ඇති බව තැපැල්පති රුවන් සත්කුමාර ප්‍රකාශ කළේය.

මෙම ලිපි සහ පාර්සල් වෙනත් තැපැල් පර්යන්ත වෙත හරවා යැවූ බව ඔහු පැවසීය.

අතිකාල දීමනා සහ පැමිණීම සටහන් කිරීම සඳහා ඇඟිලි සලකුණු යන්ත්‍ර භාවිත කිරීම ගැටළු ඇතුළු ඉල්ලීම් 19ක් මත මෙම අඛණ්ඩ වැඩ වර්ජනය පසුගිය සඳුදා ආරම්භ විය.

මෙම වැඩ වර්ජනයට එක්සත් තැපැල් සේවක සංගමය, ශ්‍රී ලංකා නිදහස් තැපැල් සහ විදුලි සංදේශ සේවක සංගමය, එක්සත් තැපැල් සහ විදුලි සංදේශ සේවා සංගමය, ශ්‍රී ලංකා නිදහස් තැපැල් සේවා සංගමය සහ ශ්‍රී ලංකා තැපැල් සේවක පෙරමුණ ආදී වෘත්තීය සමිති කිහිපයක් සහාය දක්වයි.

කොළඹ මධ්‍යම තැපැල් හුවමාරුව ඉදිරිපිට ඊයේ අඛණ්ඩ සත්‍යග්‍රහයක් ද ආරම්භ විය.

රට පුරා තැපැල් කාර්යාල 653න් ඊයේ විවෘතව තිබුණේ 169ක් පමණි.

කෙසේවෙතත්, උප තැපැල් කාර්යාල 3,211ම විවෘතව පැවතිණි

මේ අතර, සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හංසක විජේමුණි පැවසුවේ තැපැල් සේවකයන්ගේ ඉල්ලීම් දෙකක් හැර ඉතිරි ඉල්ලීම් සාකච්ඡා මාර්ගයෙන් විසඳා ගත හැකි බවයි.

තැපැල් වෘත්තීය සමිති කිහිපයක් විසින් දියත් කරන ලද වැඩ වර්ජනය හේතුවෙන් මේ වන විට රුපියල් මිලියන 100ත් 120ත් අතර මූල්‍යමය පාඩුවක් සිදුවී ඇති බව තැපැල් දෙපාර්තමේන්තුව වාර්තා කළේය.