වෙසක් සමයේදී ජනාධිපති සමාව යටතේ මතභේදාත්මක රැඳවියන් නිදහස් කිරීම සම්බන්ධයෙන් බන්ධනාගාර කොමසාරිස් ජනරාල්වරයාගෙන් ප්‍රකාශයක් සටහන් කරගෙන ඇති බව පොලිස් මාධ්‍ය අංශය පවසයි.

මූලික විමර්ශනවලින් පෙනීයන්නේ මෙම ක්‍රියාවලිය අතරතුර සිරකරුවන් ගණනාවක් නීතිවිරෝධී ලෙස නිදහස් කර ඇති බවයි.

බන්ධනාගාර බලධාරීන් නිසි ක්‍රියාපටිපාටිය උල්ලංඝනය කරමින් ක්‍රියාකර ඇත්දැයි තීරණය කිරීම සඳහා තවදුරටත් පරීක්ෂණ සිදුවෙමින් පවතී.

ජනාධිපති ලේකම් කාර්යාලය ඊයේ ප්‍රබල ප්‍රකාශයක් නිකුත් කරමින් කියාසිටියේ, රුපියල් මිලියන 4 ක මුදලක් අයථා ලෙස පරිහරණය කිරීම සම්බන්ධයෙන් වරදකරු වූ මූල්‍ය සමාගමක අනුරාධපුර ශාඛාවේ හිටපු කළමනාකරු ඩබ්ලිව්.එම්. අතුල තිලකරත්න ජනාධිපති අනුර කුමාර දිසානායක විසින් සමාව සඳහා අනුමත කරන ලද සිරකරුවන් 388 දෙනාගේ නිල ලැයිස්තුවට ඇතුළත් කර නොමැති බවයි.

එම ප්‍රකාශයට අනුව, ආණ්ඩුක්‍රම ව්‍යවස්ථාවේ 34(1) වගන්තිය යටතේ, ජනාධිපතිවරයාට නිර්දේශය මත සමාව ලබාදිය හැකිය.

බන්ධනාගාර නිලධාරීන් විසින් නම් ලැයිස්තුවක් සකස්කර, අධිකරණ අමාත්‍යාංශය විසින් සමාලෝචනය කර, පසුව අවසාන අනුමැතිය සඳහා ජනාධිපති ලේකම් කාර්යාලයට ඉදිරිපත් කරනු ලැබේ.

කෙසේවෙතත්, 2025 මැයි 6 වැනි දින අනුමත කරන ලද ලැයිස්තුවේ තිලකරත්නගේ නම අඩංගු නොවීය.