තමිල්නාඩුවේ වෙසෙන ශ්‍රී ලාංකික දෙමළ ජනතාවට ඡන්ද අයිතිය ලබාදීමට වහාම පියවර ගන්නා ලෙස PMK (Pattali Makkal Katchi) පක්ෂයේ නිර්මාතෘ එස්. රාමදාස් ඉන්දීය මධ්‍යම සහ ප්‍රාන්ත රජයන්ගෙන් ඉල්ලා තිබේ.

ශ්‍රී ලංකාවේ පැවැති සිවිල් යුද්ධය හේතුවෙන් 1983 දී ශ්‍රී ලාංකික දෙමළ ජනතාව ලක්ෂයකට අධික සංඛ්‍යාවක් තමිල්නාඩුවට පළාගිය බව එස්. රාමදාස් සිය ප්‍රකාශයේ සඳහන් කර ඇත.

අද වන විට ඔවුන් ප්‍රාන්තය පුරා සරණාගත කඳවුරු 116ක ජීවත් වන නමුත් මූලික අයිතිවාසිකම් භුක්තිවිඳීමේ නිදහස අහිමි වී තිබේ.

ඉන්දියාවේ ඉපදී අධ්‍යාපනය ලැබූ පරම්පරාවකට නීතිමය සීමාවන් හේතුවෙන් තවමත් රජයේ රැකියා සඳහා අයදුම් කළ නොහැකි බවත්, ඔවුන් රජයේ ආධාර සහ දෛනික වැටුප් මත ජීවත්වන බවත් ඔහු සඳහන් කරයි.

නේපාලය සහ භූතානය වැනි රටවල පුරවැසියන්ට රැකියා සඳහා අයැදුම් කිරීමට ඉන්දියාව ඉඩදී තිබියදීත්, පාරම්පරික සබඳතා ඇති දෙමළ ජනතාවට සමාන අයිතිවාසිකම් අහිමි වන බව ඔහු පවසයි.

ශ්‍රී ලංකාවේ ඔවුන්ගේ ජීවිත සහ ජීවනෝපායන් විනාශ වී ඇති බැවින්, සරණාගතයන් ඉන්දියාවේ ස්ථිරව ජීවත්වීමට කැමති බව රාමදාස් පෙන්වාදෙයි.

තමිල්නාඩුවේ සිදුවෙමින් පවතින ඡන්ද හිමි නාමලේඛන සංශෝධනය අතරතුර, දේශපාලන නියෝජනය සහ ගෞරවනීය ජීවිතයක් සහතික කිරීම සඳහා සුදුසුකම් ලත් ශ්‍රී ලාංකික දෙමළ ජනතාවට ඡන්ද අයිතිය ලබාදිය යුතු බව ද ඔහු අවධාරණය කර තිබේ.

එමෙන්ම රාමදාස් සියලුම දේශපාලන පක්ෂ ක්‍රියාකාරීන්ගෙන් ඉල්ලා සිටින්නේ, තමිල්නාඩුව පුරා සිදුවෙමින් පවතින ඡන්දදායක ලැයිස්තු සංශෝධනයට ක්‍රියාකාරීව සහයෝගය දක්වන ලෙසයි.

ඒ ඔස්සේ සුදුසුකම් ලත් ඡන්දදායකයන් ඇතුළත් කර නුසුදුසු නම් ඉවත් කරන ලෙසත්, මැතිවරණ කොමිෂන් සභා මාර්ගෝපදේශ දැඩි ලෙස අනුගමනය කරමින් සහ නිලධාරීන්ට සාමකාමීව සහ වගකීමෙන් යුතුව සහාය වන ලෙසත් ඔහු ඉල්ලා සිටියි