2019 පාස්කු ඉරිදා ත්‍රස්ත ප්‍රහාරය සම්බන්ධයෙන් විමර්ශනය කිරීම සඳහා අන්තර්ජාතික විමර්ශන කණ්ඩායමක් කැඳවන ලෙසට පළව ඇති මෑත කාලීන ප්‍රවෘත්ති වාර්තා සම්බන්ධයෙන් ජනාධිපති මාධ්‍ය අංශය කනස්සල්ල පළකර තිබේ.

ඉරිදා (ඔක්තෝබර් 08) ඥානාර්ථ ප්‍රදීපය පුවත්පතේ පළ වූ කතුවැකිය මෙන්ම “ස්වාධීන, විනිවිද භාවයෙන් හා පරිපූර්ණ විමර්ශනයක් සහ අධීක්ෂණයක් සඳහා අන්තර්ජාතික විමර්ශන කණ්ඩායමක් අවශ්‍යයි” යන ප්‍රවෘත්ති වාර්තාව ද ජනාධිපති මාධ්‍ය අංශය උපුටා දක්වා ඇත.

නිවේදනයක් නිකුත් කරමින් ජනාධිපති මාධ්‍ය අංශය ප්‍රකාශ කර ඇත්තේ, මහජන ආරක්‍ෂක ඇමැති ටිරාන් අලස් විසින් මෙම වසරේ අප්‍රේල් මාසයේදී කතෝලික රදගුරු සම්මේලනයේ සභාපති හැරල්ඩ් ඇන්තනි රදගුරුතුමාගේ ඉල්ලීමකට අනුව පාස්කු ප්‍රහාරය පිළිබඳ ජනාධිපති කොමිෂන් සභා වාර්තාවේ වෙළුම් 88 ක් සහ පිටු 48,909 ක් ලබාදුන් බවයි.

මේ අතර ජනාධිපති රනිල් වික්‍රමසිංහ රදගුරු සමුළුවේ නියෝජිතයන් සමඟ සාකච්ඡා කිරීමට සූදානම් වන බව ද ජනාධිපති මාධ්‍ය අංශය ප්‍රකාශ කරයි.

ශ්‍රී ලංකාවේ අභ්‍යන්තර කටයුතු සම්බන්ධයෙන් අන්තර්ජාතික පරීක්ෂණ පැවැත්වීමේ අදහස රජයට අනුමත කළ නොහැකි බව ජනාධිපති මාධ්‍ය අංශය වැඩිදුරටත් ප්‍රකාශ කරයි.

ශ්‍රී ලංකාවේ ආණ්ඩුක්‍රම ව්‍යවස්ථාව සහ දැනට පවතින අනෙකුත් සියලුම නීති අන්තර්ජාතික පරීක්ෂණ පැවැත්වීම සඳහා ප්‍රතිපාදන සපයන්නේ නැත. එහි ප්‍රතිඵලයක් ලෙස එවැනි පරීක්ෂණ පැවැත්වීම නීතිය උල්ලංඝනය කිරීමක් වනු ඇත.

චැනල් 4 රූපවාහිනී වැඩසටහන සම්බන්ධයෙන් පරීක්ෂණයක් පවත්වා වාර්තාවක් ඉදිරිපත් කිරීම සඳහා විශ්‍රාමික ශ්‍රේෂ්ඨාධිකරණ විනිසුරුවරයකුගේ ප්‍රධානත්වයෙන් කමිටුවක් ස්ථාපිත කර ඇති බව ජනාධිපති මාධ්‍ය අංශය ප්‍රකාශ කරයි.

ජනාධිපති කොමිෂන් සභා වාර්තාව රදගුරු සම්මේලනය හොඳින් සමාලෝචනය කළ පසු මේ සම්බන්ධයෙන් තවදුරටත් සාකච්ඡා කිරීමට රජය අදහස් කරන බව ජනාධිපති මාධ්‍ය අංශය තවදුරටත් සඳහන් කරයි.