මාසිකව විදුලි ඒකක 180කට වඩා වැඩියෙන් පරිභෝජනය කරන විදුලි පාරිභෝගිකයින් 300,000ක් සඳහා නොමිලේ ‘ස්මාර්ට් මීටර්’ (Smart Meters) ලබා දීමට සැලසුම් කර තිබෙන බව ජනාධිපති අනුර කුමාර දිසානායක 2027 අයවැය යෝජනා ඉදිරිපත් කරමින් අනාවරණය කළේය.

ඊට අමතරව, ලංකා විදුලි පෞද්ගලික සමාගමේ (LECO) විදුලි ඒකක 120කට වඩා භාවිත කරන සියලුම පාරිභෝගිකයන් වෙත ද මෙම ස්මාර්ට් මීටර් ලබාදීමට නියමිතය.

විදුලි පරිභෝජනය වඩාත් කාර්යක්ෂම කිරීම සහ පාරිභෝගිකයින්ට තම විදුලි භාවිතය පිළිබඳව නිවැරදි හා කාලීන තොරතුරු ලබා ගැනීමට අවස්ථාව සලසා දීම මෙම ව්‍යාපෘතියේ ප්‍රධාන අරමුණ වී තිබේ.

ස්මාර්ට් මීටර් භාවිතයට හඳුන්වා දීමත් සමඟ මාසික විදුලි බිල්පත් නිකුත් කිරීමේ ක්‍රියාවලිය වඩාත් විනිවිදභාවයෙන් යුතුව සහ නිවැරදිව සිදු කිරීමට හැකියාව ලැබෙනු ඇත.