මීගමුව බන්ධනාගාරයේ මෑතකදී ඇතිවූ ගැටුමින් පසු දැනට එහි රඳවා සිටින ඉතිරි රැඳවියන් 600කට ආසන්න පිරිස අදියර කිහිපයකින් බෝගම්බර බන්ධනාගාරය වෙත මාරු කර යැවීමට බන්ධනාගාර පාලනාධිකාරිය තීරණය කර තිබේ.

හානි සිදු වූ යටිතල පහසුකම් සම්පූර්ණයෙන්ම ප්‍රතිසංස්කරණය කර නැවත යථා තත්ත්වයට පත් කිරීමේ අරමුණින් මෙම පියවර ගෙන ඇත.

සිද්ධියෙන් අනතුරුව මීගමුව බන්ධනාගාරයේ සිටි රැඳවියන්ගෙන් සැළකිව යුතු පිරිසක් දිවයිනේ වෙනත් බන්ධනාගාර වෙත මාරු කර යවා ඇති අතර, දැනට එම පරිශ්‍රයේ රැඳී සිටින පිරිසද ඉදිරියේදී මාරු කිරීමට නියමිත බව බන්ධනාගාර කොමසාරිස් සහ මාධ්‍ය ප්‍රකාශක ඒ.සී. ගජනායක සඳහන් කර තිබේ.

මෙම රඳවා තැබීම් සහ මාරු කිරීමේ ක්‍රියාවලිය සඳහා මෑතකදී නැවත ගැසට් පත්‍රයක් මගින් ප්‍රකාශයට පත් කරන ලද බෝගම්බර බන්ධනාගාරය ප්‍රධාන වශයෙන් යොදා ගැනීමට නියමිතය.

දීර්ඝ කාලයක් තිස්සේ භාවිතයේ නොතිබීම හේතුවෙන් එහි දැනට සිදුකෙරෙන අලුත්වැඩියා කටයුතු අවසන් වූ වහාම මීගමුව බන්ධනාගාරයේ ඉතිරි පිරිස එහි යොමුකිරීමට කටයුතු කෙරෙනු ඇත.

පසුගියදා මීගමුව බන්ධනාගාරය තුළ ඇතිවූ උණුසුම් තත්ත්වයත් සමඟ පුද්ගලයන් 25 දෙනෙකුට වැඩි පිරිසක් මියගොස් තවත් පිරිසක් තුවාල ලැබූ අතර, එමගින් බන්ධනාගාර පද්ධතිය තුළ පවතින අධික තදබදය, කාර්ය මණ්ඩල හිඟය සහ ආරක්ෂිත පියවරයන්හි පවතින අඩුපාඩු පිළිබඳවද දැඩි අවධානයක් යොමු විය.

උපුටා ගැනීම – The Morning