වැඩ තහනමට ලක් කරන ලද පොලිස්පති දේශබන්ධු තෙන්නකෝන් ධුරයේ කටයුතු කිරීමේදී දැඩි ලෙස බලය අයුතු ලෙස භාවිත කිරීම පිළිබඳ චෝදනා විමර්ශනය කරන ලද කමිටු වාර්තාවෙන් ඔහු සියලු චෝදනාවලට වරදකරු වී ඇති බවත් ඔහු ඉවත් කිරීමට නිර්දේශ කර ඇති බවත් කථානායක ජගත් වික්‍රමරත්න අද පාර්ලිමේන්තුවට දැනුම් දුන්නේය.

විමර්ශන කමිටු වාර්තාව පාර්ලිමේන්තුවට ඉදිරිපත් කරමින් කථානායකවරයා ප්‍රකාශ කළේ 2002 අංක 5 දරන නිලධාරීන් ඉවත් කිරීමේ (ක්‍රියාපටිපාටිය) පනතේ විධිවිධාන යටතේ, වත්මන් පොලිස්පතිවරයා ඉවත් කිරීමට හේතු විමර්ශනය කර වාර්තා කිරීම සඳහා අදාළ විමර්ශන කමිටුව පත් කරන ලද බවයි.

පනතට අනුකූලව නිසි ලෙස පිහිටුවන ලද කමිටුවේ විධිමත් වාර්තාව තමාට ලැබී ඇති බවත් කමිටුවේ කීර්තිමත් සාමාජිකයන්ගේ කඩිසරකම, අඛණ්ඩතාව සහ නීතියේ ආධිපත්‍යය සඳහා කැපවීම සම්බන්ධයෙන් අවංක කෘතඥතාව පළකරන බවත් ඔහු සඳහන් කළේය.

ශ්‍රේෂ්ඨාධිකරණ විනිසුරු පද්මන් සූරසේනගේ සභාපතීත්වයෙන් යුත් කමිටුවේ සාමාජිකයන් ලෙස අභියාචනාධිකරණ විනිසුරු නීල් ඉද්දවල, ජාතික පොලිස් කොමිසමේ සභාපති ලලිත් ඒකනායක කටයුතු කළහ.

මෙම කමිටුව සිය පරීක්ෂණ පවත්වා, පනතේ 8(2) වගන්තියට අනුව, අදාළ නිලධාරියාට එරෙහිව ඉදිරිපත් කර ඇති චෝදනා සම්බන්ධයෙන් ඔහු වැරදිකරු බව ඒකමතිකව තීරණය කර ඇති බව කථානායකවරයා දැනුම්දුන්නේය.

මෙය මෙරට ව්‍යවස්ථාමය ගමනේ ඓතිහාසික අවස්ථාවක් සනිටුහන් කරන බවත් ශ්‍රී ලංකා ජනරජ ඉතිහාසයේ එවැනි කමිටුවක් පාර්ලිමේන්තුව විසින් පනවන ලද නීතියේ විධිවිධාන යටතේ පොලිස්පතිවරයකු ඉවත් කිරීමට නිර්දේශ කරමින් තම වාර්තාව ඉදිරිපත් කළ පළමු අවස්ථාව මෙය බවත් ඔහු සඳහන් කළේය.

නිලධාරීන් ඉවත් කිරීමේ (ක්‍රියාපටිපාටිය) පනතේ 17 වැනි වගන්තිය යටතේ නියම කර ඇති පරිදි, පාර්ලිමේන්තුව විසින් සළකා බැලීම සහ ඡන්දය ප්‍රකාශ කිරීම සඳහා න්‍යාය පත්‍රයේ යෝජනාවක් ආකාරයෙන් තැබීමට තමන් බැඳී සිටින බව ද කථානායකවරයා සඳහන් කළේය.

මන්ත්‍රීවරුන්ගේ දැනගැනීම සඳහා සහ විනිවිදභාවය සහ මහජන වගවීම සඳහා, කමිටු වාර්තාව පාර්ලිමේන්තු පත්‍රිකාවක් ලෙස සභාගත කරන ලෙස කථානායකවරයා පාර්ලිමේන්තු මහලේකම්වරයාට නියෝග කර ඇත.

මහජන අවශ්‍යතා සහ ආයතන කෙරෙහි තබා ඇති විශ්වාසය ආරක්ෂා කිරීමේ මූලික වැදගත්කම සැළකිල්ලට ගනිමින්, එය මහජනතාවට නිකුත් කිරීමට අවසර දීමට ද අදහස් කරන බව කථානායකවරයා සඳහන් කළේය.

යෝජනාව සළකා බැලීම, විවාදය සහ ඡන්දය සඳහා නියමිත දිනය පිළිබඳ නියමිත වේලාවට සභාවට දැනුම් දෙන බව ද ඔහු පැවසීය.