කාන්තාවක් සමඟ ඇසුරක් පැවැත්වූ 23 හැවිරිදි තරුණයෙක් ඇයගේ නිරුවත් ඡායාරූප සැමියාට යවන බවට තර්ජනය කර ඇය සතු රන් ආභරණ බලහත්කාරයෙන් රැගෙන යෑම හේතුවෙන් අත්අඩංගුවට ගෙන ඇත.

ඊයේ (19) මීගමුව පොලිස් ස්ථානයට කළ පැමිණිල්ලකට අනුව සැකකරු මෙසේ අත්අඩංගුවට ගත් බව පොලීසිය සඳහන් කරයි.

පරීක්‍ෂණවලට අනුව සැකකරු විසින් කාන්තාව හෝටල් කාමරයකට රැගෙන ගොස්‌ එහිදී ඇයගේ නිරුවත් ඡායාරූප ලබාගෙන ඇත.

අනතුරුව සැකකරු විසින් එම කාන්තාවගේ නිරුවත් ඡායාරූප සැමියාට පෙන්වන ලෙස තර්ජනය කර රුපියල් 1,785,000ක් වටිනා රන් ආභරණ බලහත්කාරයෙන් ලබාගෙන තිබේ.

ඇයගේ පැමිණිල්ලෙන් පැය කිහිපයකට පසු මීගමුව ගෝමස්වත්ත ප්‍රදේශයේදී සැකකරු අත්අඩංගුවට ගෙන ඇත.

ප්‍රශ්න කිරීමේදී සැකකරු විසින් සොරාගත් රන් මාලය මීගමුවේ වෙළදසැලකට විකුණා තිබියදී ග්‍රෑම් 04ක් බරැති රන් කැබැල්ලක් ලෙස සොයා ගෙන තිබේ.

අත්අඩංගුවට ගත් සැකකරු මීගමුව ප්‍රදේශයේ පදිංචිකරුවෙක් වන අතර, ඔහු මීගමුව මහේස්ත්‍රාත් අධිකරණයට ඉදිරිපත් කිරීමට නියමිතය.