මන්නාරම් ද්‍රෝණියේ අක්වෙරළ ස්වභාවික තෙල් සහ ගෑස් නිධි වාණිජමය වශයෙන් නිස්සාරණය කිරීම සඳහා ලංසු කැඳවීම ඉදිරියට ගෙන යෑම වෙනුවෙන් අලෙවිකරණ උපදේශකයකු තෝරා ගැනීම මෙම සතියේ අවසන් කිරීමට ශ්‍රී ලංකාව සූදානම් බව වාර්තා වේ.

ඛනිජ තෙල් සංවර්ධනය සඳහා අන්තර්ජාතික ලංසු තැබීමේ ක්‍රියාවලිය සිදු කිරීම සඳහා විශේෂඥතාවක් ඇති උපදේශක සමාගමක් තෝරා ගැනීමට රජය මීට පෙර ටෙන්ඩර් කැඳවා තිබිණි.

2020 සැප්තැම්බර් මාසයේදී මෙරට ස්වාභාවික ගෑස් පිළිබඳ ජාතික ප්‍රතිපත්තියක් ගැසට් කරන ලද අතර, එමඟින් දේශීය ඉල්ලුම නිර්මාණය කිරීමේ උපාය මාර්ග ගෙනහැර දක්වමින් සහ ක්‍රියාකරුවන්ට අක්වෙරළ ගෑස් වාණිජකරණය කිරීම සඳහා විකල්ප ලබා දී ඇත.

ක්‍රියාවලිය නියාමනය කිරීම සඳහා 2021 අංක 21 දරන නව ඛනිජ තෙල් සම්පත් පනතක් ද හඳුන්වා දී තිබේ.

ශ්‍රී ලංකාවේ ඛනිජ තෙල් සංවර්ධන අධිකාරිය (PDASL) ස්වාධීන නියාමකයා ලෙස ද ස්ථාපිත කර ඇත.

වාර්තා වන පරිදි ඉන්දියාවේ සහ කටාර්හි සමාගම් දැනටමත් ශ්‍රී ලංකාවේ ක්‍රියාවලිය සඳහා කැමැත්ත පළ කර ඇත

රටේ විවිධ ස්ථානවල වාණිජමය වශයෙන් ශක්‍ය ස්වාභාවික ගෑස් සංචිත හඳුනාගෙන ඇතත්, රජය මුලින් මන්නාරම් ද්‍රෝණියේ කොටස් හතරක ආයෝජනය කිරීමට සැලසුම් කරයි

පාර්ලිමේන්තු මාධ්‍ය ඒකකයේ 2021 මාධ්‍ය නිවේදනයකට අනුව, අමෙරිකානු ඩොලර් බිලියන 267ක් වටිනා තෙල් හා ගෑස් සම්පත් මන්නාරම් ද්‍රෝණියේ ඇත.

ශ්‍රී ලංකා රජය 2008 දී වයඹ වෙරළ තීරයෙන් තෙල් හා ගෑස් ගවේෂණය කිරීම සඳහා කේන් ඉන්දියා ලිමිටඩ් සමාගම සමඟ ගිවිසුමක් අත්සන් කළේය.

ඉන්දියානු සමාගමේ අනුබද්ධිත සමාගමක් වන කේන් ලංකා ලිමිටඩ්, 2011 දී මන්නාරම් ද්‍රෝණියේ ගවේෂණ ළිං දෙකක් කැණූ අතර බැරැකුඩා සහ ඩොරාඩෝ ක්ෂේත්‍රවල ස්වාභාවික ගෑස් සොයා ගත්තේය.

එකල එය නිස්සාරණය කිරීම ඉතා මිල අධික යැයි සැළකිණි.