සේවක අර්ථසාධක අරමුදලේ යෝජිත ත්‍රෛපාර්ශවික කළමනාකරණ ක්‍රමවේදයට සිය සාමූහික විරෝධය පළ කරමින්, වෘත්තීය සමිති සහ සිවිල් සමාජ සංවිධාන 30කට අධික සංඛ්‍යාවක් ජනාධිපති අනුර කුමාර දිසානායක වෙත ලිපියක් යොමු කර තිබේ.

එම ලිපියේ දැක්වෙන්නේ ලංකා සේවා යෝජකයන්ගේ සම්මේලනය, ජාත්‍යන්තර මූල්‍ය අරමුදල සහ ජාත්‍යන්තර කම්කරු සංවිධානය යන පාර්ශ්වයන්ගේ ඒකාබද්ධ මැදිහත්වීමෙන් ක්‍රියාත්මක වන ත්‍රෛපාර්ශවික මණ්ඩලයකට සේවක අර්ථසාධක අරමුදල පවරා දීමටත්, එම අරමුදල් පුද්ගලික කොටස් සහ ණය වෙළඳපොළවල් තුළ ආයෝජනය කිරීම වැඩි කිරීමටත් රජය සතු සැලැස්ම සම්බන්ධයෙන් ඔවුන් දැඩි විරෝධය පළ කරන බවයි.

මෙරට ආයතනික අංශය තුළ පවතින නීති විරෝධී ව්‍යාපාරික පිළිවෙත්, මූල්‍ය වංචා, බදු පැහැර හැරීම් සහ ව්‍යාපාරික අක්‍රමිකතා හේතුවෙන්, රටේ විශාලතම විශ්‍රාම වැටුප් අරමුදල ඔවුන්ගේ අතට පත් කිරීම අතිශයින්ම අවදානම් සහගත බව ද එම පාර්ශව අදාළ ලිපිය මගින් පෙන්වා දී ඇත.

දේශීය ණය ප්‍රතිව්‍යුහගතකරණය හේතුවෙන් EPF අරමුදලට සිදුව ඇති නාමික පාඩුව රුපියල් බිලියන 634.4 ක් පමණ වන අතර, අහිමි වූ ප්‍රතිලාභ ද සමඟ සමස්ත පාඩුව රුපියල් බිලියන 1,711 දක්වා ඉහළ ගොස් ඇති බව ඔවුන් පෙන්වා දෙයි. මෙය අරමුදලේ අපේක්ෂිත දළ ආදායමෙන් 48% ක විනාශයකි.

මෙම අර්බුදකාරී තත්ත්වය සහ යෝජිත ප්‍රතිසංස්කරණ සම්බන්ධයෙන් සාකච්ඡා කිරීම සඳහා වහාම ජනාධිපතිවරයා හමුවී සාකච්ඡා කිරීමට කාලයක් ලබා දෙන ලෙස ද මෙම වෘත්තීය සමිති සහ සිවිල් සංවිධාන සන්ධාන ඉල්ලීමක් කර තිබේ.

යෝජිත ත්‍රෛපාර්ශවික කළමනාකරණ ක්‍රමවේදයට එරෙහි ප්‍රධාන විරෝධතා 4ක් ද ඔවුන් විසින් ඉදිරිපත් කර ඇති අතර
ජාත්‍යන්තර ක්‍රියාමාර්ග පිළිබඳ පදනම් විරහිත ස්ථාවර, ව්‍යාපාරික ක්ෂේත්‍රයේ අනිසි බලපෑම්, අභ්‍යන්තර තොරතුරු මත පදනම්ව කල්තියා ගනුදෙනු කිරීමේ අවදානම සහ වළක්වා ගත නොහැකි නීතිමය හිදැස් ඒ අතර වේ.

මේ ඔස්සේ ආයෝජන විශ්ලේෂකයන් හෝ වෘත්තීය සමිති සිටියද, ආයෝජන යෝජනා මණ්ඩලයේ අනුමැතියට යා යුතු බැවින් පෞද්ගලික අංශයට අභ්‍යන්තර තොරතුරු ගලා යාම වැළැක්විය නොහැකි බව ද ඔවුහු පෙන්වා දෙති.

ආයතනික අවශ්‍යතා සඳහා අරමුදල භාර දීම වෙනුවට, නිරපේක්ෂ විනිවිදභාවය ක්‍රියාත්මක කරන අතරම, නියාමන බලධාරීන්ගේ සහ මහජනතාවගේ දිරිගැන්වීම් පෙළගස්වන ව්‍යුහාත්මක නීතිමය ප්‍රතිසංස්කරණ කිහිපයක් ද විකල්ප විසඳුම් ලෙස ඔවුන් යෝජනා කර තිබේ.

ඒ අතර ශ්‍රී ලංකා මහ බැංකුවේ සුවිශේෂී කාර්ය මණ්ඩල අර්ථසාධක අරමුදල විසුරුවා හැර අරමුදල් මහජන EPF එකට ඒකාබද්ධ කිරීම සඳහා 2023 අංක 16 දරන ශ්‍රී ලංකා මහ බැංකු පනත සංශෝධනය කිරීම සහ සියලුම EPF ආයෝජන, වත්කම් වෙන් කිරීම් සහ ගනුදෙනු ක්‍රියාත්මක කිරීම් පිළිබඳ තොරතුරු ක්‍රමානුකූලව මහජනයාට හෙළිදරව් කිරීම අනිවාර්ය කිරීම ඇතුළත් වේ.