දැනට සිටින මූලස්ථාන පොලිස් පරීක්ෂකවරුන්, ස්ථානාධිපතිවරුන් සහ අපරාධ අංශ ස්ථානාධිපතිවරුන් 5,308 අතරින් නිලධාරීන් 1,106ක් ඔවුන් සිටින පොලිස් කොට්ඨාස තුළම ස්ථිරව පදිංචිව සිටින බව අනාවරණය වී තිබේ.

එය සමස්තයක් වශයෙන් ගත කළ 7.2%කි.

පොලිස්පති දේශබන්දු තෙන්නකෝන්ගේ උපදෙස් මත උතුරුමැද පළාත භාර ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය විසින් සිදුකළ නවතම අධ්‍යයනයකදී මේ බව අනාවරණ වී තිබේ.

එම වාර්තාව පොලිස්පතිවරයා වෙත ඊයේ භාරදී තිබිණි.

මෙම වාර්තාවට අනුව වැඩිම පොලිස් නිලධාරීන් සංඛ්‍යාවක් ඔවුන් ස්ථිරව පදිංචිව සිටින ප්‍රදේශයේම රාජකාරි කරන්නේ මන්නාරම පොලිස් කොට්ඨාසයේය.

එසේම අනුරාධපුර, මාතර වැනි ප්‍රදේශවල පදිංචි නිලධාරීන් ද මෙම ප්‍රවණතාවට දායක වී තිබේ.

මෙය මෙම කොට්ඨාසවල ඉහළ අපරාධ අනුපාතයක් වාර්තා වීමට හේතු වී ඇති අතර, පසුගිය වසර තුන තුළ වැඩිම අපරාධ අනුපාතයක් ඇති අනුරාධපුර කොට්ඨාසය උදාහරණයක් ලෙස කැපී පෙනේ.

නිවාස ලබා ගැනීමේ හැකියාව සහ ප්‍රවාහන වියදම් වැනි අභියෝග නිලධාරීන්ට ඔවුන්ගේ නේවාසික ප්‍රදේශවල සේවය කිරීමට බලපා තිබුණ ද රාජකාරි ඉටු කිරීමේදී එය ඔවුන්ගේ අපක්ෂපාතීත්වයට බලපෑම් කළ හැකි බවට අදහසක් ඉදිරිපත් වී ඇත.

එය ඔවුන්ගේ ක්‍රියාවන්හි පක්ෂග්‍රාහී බව සම්බන්ධයෙන් සහ ක්‍රියාකාරීත්වයට මෙන්ම අපරාධ වැළැක්වීමේ ප්‍රයත්නයන්ට ද බලපාන බව වාර්තාව මගින් පෙන්වාදෙයි.

මෙම ගැටලු නිරාකරණය කිරීම සඳහා කෙටි කාලීන, මධ්‍ය කාලීන සහ දිගු කාලීන නිර්දේශ යෝජනා වී ඇති අතර, වාර්තාවේ සොයාගැනීම්වලට ප්‍රතිචාර වශයෙන් පොලිස්පතිවරයා විසින් අවශ්‍ය ක්‍රියාමාර්ග ගන්නා බව පොලිස් මූලස්ථානය පෙන්වා දෙයි.