බොලිවුඩ් සුපිරි තරුව ෂාරුක් ඛාන්ගේ ඉදිරියේදී තිරගත වීමට නියමිත ‘King’ චිත්‍රපටයේ විදේශීය ප්‍රචාරණ අයිතිය (Overseas distribution deal) ඉන්දියානු රුපියල් කෝටි 175 ක (ඉන්දීය රුපියල් බිලියන 1.75 ක) වාර්තාගත මුදලකට අලෙවි වී ඇති බව වාර්තා වේ. මෙය ඉන්දියානු සිනමා ඉතිහාසයේ නව වාර්තාවකි.

NDTV Profit වාර්තාවලට අනුව, ඩුබායි හි පිහිටි Phars Films සමාගම විසින් මෙම චිත්‍රපටයේ අන්තර්ජාතික සිනමාශාලා ප්‍රචාරණ අයිතිය (International theatrical distribution rights) ඉන්දීය රුපියල් කෝටි 175 ක අවම වගකීම් ගිවිසුමක් (Minimum guarantee agreement) යටතේ ලබාගෙන ඇත.

මෙම ගිවිසුම ඉන්දියානු චිත්‍රපටයක් වෙනුවෙන් ලැබුණු ඉහළම විදේශීය අවම වගකීම් මුදල වන අතර, මීට පෙර කිසිදු ඉන්දියානු නිෂ්පාදනයක් මෙවැනි ගිවිසුමක් සඳහා රුපියල් කෝටි 100 සීමාව පවා පසුකර නැත.

මීට පෙර ෂාරුක් ඛාන්ගේ සාර්ථක චිත්‍රපට වූ Pathaan, Jawan සහ Dunki සඳහා විදේශීය ප්‍රචාරණ කටයුතු කළ Yash Raj Films (YRF) සමාගම වෙනුවට මෙවර Phars Films සමාගම එම කටයුතු භාරගැනීමට නියමිතය.

මෙම නව වැඩපිළිවෙල යටතේ Phars Films සමාගම මැදපෙරදිග කලාපයේ ප්‍රචාරණ කටයුතු සෘජුවම සිදුකරන අතර, උතුරු ඇමෙරිකාව සහ යුරෝපය ඇතුළු අනෙකුත් ජාත්‍යන්තර වෙළඳපොළවල් සඳහා ප්‍රදේශයේ දේශීය බෙදාහරින්නන් සමග එක්ව කටයුතු කිරීමට නියමිතය.

මෙම දැවැන්ත ගිවිසුම හේතුවෙන් ‘King’ චිත්‍රපටය වෙත ඉහළ වාණිජමය බලාපොරොත්තුවක් ගොඩනැගී ඇති අතර, යොදවන ලද ආයෝජනය නැවත ලබාගැනීම සඳහා චිත්‍රපටයට අන්තර්ජාතික සිනමාශාලා තුළින් ඉහළ ආදායමක් (Box-office collections) ඉපැයීමට සිදුවනු ඇත.

Pathaan චිත්‍රපටයේදී ෂාරුක් ඛාන් සමග කටයුතු කළ සිද්ධාර්ත් ආනන්ද් විසින් අධ්‍යක්ෂණය කරනු ලබන මෙම චිත්‍රපටය සඳහා දීපිකා පදුකෝන්, සුහානා ඛාන්, අභිෂේක් බච්චන්, අනිල් කපූර් සහ රාණි මුකර්ජි ඇතුළු සුපිරි නළු නිළියෝ රැසක් රංගනයෙන් දායක වෙති.

මෙම චිත්‍රපටය 2026 දෙසැම්බර් 24 වැනි දින සිට නත්තල් නිවාඩු සමයේදී ලොව පුරා තිරගත කිරීමට නියමිතව ඇත.