රුපියල් මිලියන 43කට අධික චෙක්පත් වංචා නඩුවක් සම්බන්ධයෙන් අගෝස්තු 20 වැනිදා අධිකරණය හමුවේ පෙනී සිටින ලෙස කොළඹ කොටුව මහේස්ත්‍රාත් නිලුපුලි ලංකාපුර ව්‍යාපාරිකයන් යුවළක් වන නරේජ් පරසුරාම් භූමානි සහ මීනා භූමානිට නොතීසි නිකුත් කර තිබේ.

ඉදිරිපත් වී ඇති පැමිණිල්ලට අනුව, සැකකරුවන් ව්‍යාපාරික අරමුණු සඳහා වෙනත් ව්‍යාපාරිකයකුගෙන් ලබාගත් මුදලකට අගරු චෙක්පත් නිකුත් කර ඇති අතර, එමඟින් එම ව්‍යාපාරිකයාට රුපියල් මිලියන 43.2ක් වංචා කර ඇති බවට චෝදනා එල්ල වී තිබේ.

2023 දී මීගමුව ප්‍රදේශයේ ව්‍යාපාරිකයකු විසින් ගොනු කරන ලද මෙම පැමිණිල්ලක් මත පදනම්ව බැංකු මගින් ණය අයකර ගැනීමේ (විශේෂ විධිවිධාන) පනත යටතේ සැකකරුවන්ට එරෙහිව චෝදනා ගොනු කර ඇත.

අතිරේක සොලිසිටර් ජනරාල් දිලීප පීරිස්ගේ අධීක්ෂණය යටතේ සිදු කරන ලද විමර්ශනවලින් පසුව චෝදනා පත්‍ර ගොනු කර තිබේ.

ව්‍යාපාරිකයා විසින් සැකකරුවන්ට ලබා දී ඇති මුළු මුදල රුපියල් 13,205,572ක් බවත්, එම මුදල තවමත් ආපසු ගෙවා නොමැති බැවින්, ණය ගිවිසුමට අනුව ගණනය කිරීමේ දී මුළු වංචාව රුපියල් 43,205,572ක් බවත් ඔහු අධිකරණයට දැන්වීය.

නීතිපතිවරයාගේ උපදෙස් පරිදි ගොනු කර ඇති චෝදනා සමථයකට පත් කළ නොහැකි බව විමර්ශන නිලධාරියා අධිකරණයට දැනුම්දුන් අතර සැකකරුවන්ට නොතීසි නිකුත් කරන ලෙස ද ඔහු අධිකරණයෙන් ඉල්ලා සිටියේය.