October 14, 2026
හිටපු පාර්ලිමේන්තු මන්ත්‍රී විමල් වීරවංශ රූපවාහිනී සාකච්ඡාවකදී කෘත්‍රිම බුද්ධිය (AI) මගින් සකස් කළ ඡායාරූපයක් ප්‍රදර්ශනය කිරීම සම්බන්ධයෙන් නියෝජ්‍ය අමාත්‍ය චතුරංග අබේසිංහ ප්‍රතිචාර දක්වා ඇති අතර, නියෝජ්‍ය ඇමතිවරයා පවසන්නේ ඔහු ව්‍යාජ ලෙස සකස් කළ ඡායාරූපයකට රැවටී ඇති බවයි.
සමාජ මාධ්‍ය සටහනක් තබමින් චතුරංග අබේසිංහ, මුල් ඡායාරූපය සහ වෙනස් කරන ලදැයි කියන ඡායාරූපය එකට තබා ගනිමින් පවසා ඇත්තේ දේශපාලනික චෝදනා එල්ල කිරීම සඳහා විමල් වීරවංශ මෙලෙස වෙනස් කළ ඡායාරූපයක් භාවිත කර ඇති බවයි.
මුල් ඡායාරූපයේ දැක්වෙන්නේ 2022 අරගලය සමයේදී ශ්‍රී ලංකා පොදුජන පෙරමුණේ ආධාරකරුවන් එල්ල කළ ප්‍රහාරයකින් විරෝධතාකරුවන් බේරාගැනීමට උපකාර කළ ‘අමල්’ නමැති පුද්ගලයා සමඟ තමන් සිටින අයුරු බව චතුරංග අබේසිංහ පැහැදිලි කරයි.
අනෙකුත් පිරිස් විරෝධතා භූමියට පැමිණීමට පෙර ප්‍රහාරකයන්ට මුහුණදුන් අතලොස්සක් වූ පිරිස අතර අමල් ද සිටි බව ඔහු පවසයි.
නියෝජ්‍ය ඇමැති අබේසිංහට අනුව, එම සිදුවීමේදී අමල් කළ කැපවීම අගය කිරීමක් ලෙස මෙම ඡායාරූපය ගෙන ඇත.
කෙසේවෙතත්, අමල්ව බෞද්ධ භික්ෂූන් වහන්සේනමක් ලෙස නිරූපණය කිරීම සඳහා මෙම ඡායාරූපය පසුව කෘත්‍රිම බුද්ධිය භාවිතයෙන් වෙනස් කර ඇති බවට ඔහු චෝදනා කරයි.
පහතින් දැක්වෙන්නේ මේ සම්බන්ධයෙන් නියෝජ්‍ය ඇමැතිවරයා සිය සමාජ මාධ්‍ය ගිණුමේ තබා ඇති සටහනයි.
