උතුරු කොරියානු නායක කිම් ජොන් උන්ගේ නව යොවුන් වියේ පසුවන දියණිය හමුදා පුහුණු අභ්‍යාසයක් අතරතුර තම පියා සමඟ ටැංකියක් පදවන අයුරු දැක්වෙන වීඩියෝවක් නිකුත් වී තිබේ.

එය තම අනුප්‍රාප්තිකයා ලෙස ඇයව සූදානම් කරන බවට අනුමාන කිරීම් ඉහළ දැමීමට හේතු වී ඇත.

රාජ්‍ය මාධ්‍ය විසින් නිකුත් කරන ලද දර්ශනවල, කිම් සහ ඔහුගේ දියණිය ඔවුන් බොහෝ විට පැළඳ සිටින කළු සම් ජැකට්වලින් සැරසී සිටින අයුරු දක්නට ලැබේ.

කිම් ජු-ඒ නම් දියණිය ඔලිව්-කොළ පැහැති යුද ටැංකිය පදවද්දී කිම් ටැංකියේ මුදුනේ වාඩි වී සිනාසෙමින් අනෙකුත් සොල්දාදුවන් වට කරගෙන සිටිනු දැකිය හැකිය

“ඇය අඩු වේගයකින් කෙළින්ම රිය පැදවූවා. නවීන ටැංකි පැදවීම පහසු වන අතර ඇය පැතලි බිමක සිටි බැවින් ඇයට රිය පැදවීම පහසු වූ බව මම සිතනවා,” යනුවෙන් දකුණු කොරියාවේ කොරියානු ආරක්ෂක ජාලයේ විශේෂඥ ලී ඉල්වූ පැවසීය.

නිල කොරියානු මධ්‍යම ප්‍රවෘත්ති ඒජන්සිය (KCNA) සිකුරාදා වාර්තා කළේ කිම් ටැංකි ඒකක සහ පාබල හමුදා සම්බන්ධ සරඹ අභ්‍යාසයක් අධීක්ෂණය කළ අතර ඔවුන් දෙදෙනා රොකට් දියත් කිරීම් සහ පිස්තෝල වෙඩි තැබීම් නැරඹීම සඳහා ඊට දින කිහිපයකට පෙර සහභාගී වී තිබූ බවයි.

කිම්ගේ දියණිය මෑත මාසවලදී ආයුධ පරීක්ෂණ, හමුදා පෙළපාළි සහ කර්මාන්තශාලා විවෘත කිරීම් ඇතුළු ඉහළ පෙළේ හමුදා සිදුවීම්වලදී ඇගේ පියා සමඟ නිතර නිතර දක්නට ලැබිණි.

ඇය ප්‍රථම වරට ප්‍රසිද්ධියේ පෙනී සිටියේ 2022 නොවැම්බර් මාසයේදී දිගු දුර මිසයිල අත්හදා බැලීමකදීය.

ඇගේ තරුණ වයස සහ රටේ ගැඹුරින් ගතානුගතික සංස්කෘතිය සහ පුරුෂ ආධිපත්‍යය දරන නායකත්වයේ ඉතිහාසය උපුටා දක්වමින් දකුණු කොරියානු නිලධාරීන් මුලින් ඇයව උතුරු කොරියානු නායිකාවක් ලෙස තෝරා ගත හැකිද යන්න පිළිබඳ ප්‍රශ්න කර තිබිණි.

ඇය වැඩි වැඩියෙන් පෙනී සිටියද, උතුරු කොරියානු රාජ්‍ය මාධ්‍ය කිසි විටෙකත් කිම්ගේ දියණියගේ නම ප්‍රකාශයට පත් කර නොමැති අතර, ඇයව ඔහුගේ ‘ගෞරවනීය’ හෝ ‘වඩාත්ම ආදරණීය’ දරුවා ලෙස පමණක් සඳහන් කරයි.