සපුගස්කන්ද තෙල් පිරිපහදුව ලංකා ඛනිජ තෙල් නීතිගත සංස්ථාවෙන් ඉවත්කොට වෙනම පෞද්ගලික ආයතනයක් ලෙස ක්‍රියාත්මක කිරීමට ගත් තීරණය අවලංගු කර ඇති බව වාර්තා වේ.

වෙනම ව්‍යාපාරයක් ලෙස පිරිපහදු මෙහෙයුම් කටයුතු සඳහා පසුගිය කැබිනට් මණ්ඩලය විසින් අනුමැතිය ලබා දී තිබියදීත්, ඛනිජ තෙල් නීතිගත සංස්ථාවේ අලුතින් පත් වූ සභාපති ඩී.ඒ. රාජකරුණා ප්‍රකාශ කළේ දැනුවත් තීරණයක් ගැනීමට තවමත් කල් වැඩි බවයි.

“මේ සම්බන්ධයෙන් තවමත් කිසිදු තීරණයක් ගෙන නැහැ. එවැනි තීරණ ඉදිරියට ගෙන යෑමට පෙර අපට තවත් සාකච්ඡා, අධ්‍යයන සහ පර්යේෂණ කරන්න අවශ්‍යයි,” යනුවෙන් ඔහු පවසා තිබේ.

රාජකරුණා ප්‍රකාශ කරන්නේ ඛනිජ තෙල් නීතිගත සංස්ථාවට එහි ඉදිරි කටයුතු සඳහා රාමුවක් දැනටමත් ඇති අතර, එවැනි උපාය මාර්ග ඉදිරියට ක්‍රියාත්මක කිරීමට කාලය සහ ශ්‍රමය ගත වන බවයි.

දැනට බලශක්ති අංශය සඳහා ප්‍රතිපත්තියක් සකස් කර ප්‍රකාශයට පත් කර ඇති බවත් එම ප්‍රතිපත්තියට අනුව වැඩ කිරීමට අවධානය යොමු කර ඇති බවත් ඔහු සඳහන් කරයි.

ශ්‍රී ලංකාවේ එකම තෙල් පිරිපහදුව වන සපුගස්කන්ද තෙල් පිරිපහදුව රජය සතු ව්‍යවසායයක් බවට පත්කිරීමෙන් එහි සේවකයන් 650 කට වැඩි පිරිසකට රැකියා අහිමි විය හැකි බවට මීට පෙර චෝදනා එල්ල විය.

අනාගත බඳවා ගැනීමේ අවශ්‍යතා සඳහා ඉතිරි සේවකයන් සංචිතයක තබමින් සේවකයන් 200ක් පමණ පමණක් රඳවා ගැනීමට එවක රජය අදහස් කළ බවට චෝදනා පැතිර ගියේය.

පිරිපහදු මධ්‍යස්ථානයෙන් පිරිපහදුව වෙන් කිරීමේ මෙම යෝජනාව මාර්තු මාසයේදී ඇමැති මණ්ඩලය විසින් අනුමත කරන ලද අතර, පිරිපහදුවේ පැරණි යටිතල පහසුකම් නවීකරණය කිරීම සඳහා සහ ඉදිරි වසර 25 සඳහා මෙහෙයුම් කාර්යක්ෂමතාව සහතික කිරීම සඳහා තීරණාත්මක ආයෝජන අවශ්‍ය බව වාර්තා වේ.

ඉරානයෙන් ගෙන්වන සැහැල්ලු බොරතෙල් සැකසීම සඳහා සපුගස්කන්ද පහසුකම ප්‍රථම වරට ආරම්භ කරන ලද්දේ 1969 අගෝස්තු මාසයේදීය.

එහි යටිතල පහසුකම් වැඩිදියුණු කිරීම සඳහා සුදුසු ආයෝජන හවුල්කරුවකු සොයා ගැනීම සඳහා උනන්දුවක් දක්වන ප්‍රකාශ කැඳවන බව විදුලිබල හා බලශක්ති හිටපු ඇමැති කංචන විජේසේකර නිවේදනය කර තිබිණි.

මීට අමතරව, පිරිපහදුව ත්‍රිකුණාමලයට ගෙන යෑමට සැලසුම් කර ඇති අතර, එය නවීන පහසුකම් සහ පුළුල් කරන ලද ටැංකි සංකීර්ණයකින් සමන්විත වනු ඇත.

කෙසේවෙතත්, ලංකා ඛණිජ තෙල් පොදු සේවක සංගමයේ සභාපති අශෝක රන්වල චෝදනා කළේ, ඉහළ නිලධාරීන්ට නව සමාගමේ අධ්‍යක්ෂ තනතුරු ලබා දීමට පොරොන්දු වී ඇති බවත්, එය මෙම වෙනසට විරුද්ධ නොවීම හේතු වූ බවත්ය.

පිරිපහදුව පෞද්ගලීකරණය කිරීමෙන් රැකියා අහිමි විය හැකි බවත් ඛනිජ තෙල් ක්ෂේත්‍රය පිළිබඳ රජයේ පාලනය හීන විය හැකි බවටත් රන්වල අනතුරු ඇඟවීය.