2022 දී එවක ජනාධිපති ගෝඨාභය රාජපක්ෂ බලයෙන් පහකිරීම සඳහා පැවැත්වුණු මහජන විරෝධතාවලට සම්බන්ධ කුමන්ත්‍රණ න්‍යාය කථානායක මහින්ද යාපා අබේවර්ධන විසින් ප්‍රතික්ෂේප කර තිබේ.

අරගලය විරෝධතාවට විදේශීය හස්තයක් ඇති බවට චෝදනා කරමින් පාර්ලිමේන්තු මන්ත්‍රී විමල් වීරවංශ ඒ පිළිබඳ සොයා බලන ලෙස ඉල්ලා සිටියේය.

ඒ සම්බන්ධයෙන් පාර්ලිමේන්තුව විවාදයක් පැවැත්විය යුතු බවත් චෝදනා විමර්ශනය කිරීමට කමිටුවක් පත් කළ යුතු බවත් ඔහු කථානායකවරයාට පැවසීය.

කෙසේවෙතත්, කථානායක මහින්ද යාපා අබේවර්ධන ප්‍රකාශ කළේ විරෝධතාවලට සම්බන්ධ කුමන්ත්‍රණයක් සම්බන්ධයෙන් තමන් සතුව සාක්ෂි නොමැති බවයි.

මහජනතාව උද්ඝෝෂණ කරමින් පාර්ලිමේන්තුවට කඩාවැදීමට පවා උත්සාහ කළ බව පැහැදිලි යැයි ඔහු පැවසීය.

2022 වසරේ බරපතළ ආර්ථික අර්බුදයකදී දහස් ගණන් ජනතාව පාරට බැස විරෝධතා දැක්වූ අතර ගෝඨාභය රාජපක්ෂට සහ ඔහුගේ කැබිනට් මණ්ඩලයට ඉල්ලා අස්වීමට බල කෙරිණි.