November 5, 2025
වයස අවුරුදු 12ට අඩු පාසල් සිසුන්ට ස්මාර්ට්ෆෝන් භාවිතය තහනම් කිරීම දැනට යෝජනාවක අදියරේ පමණක් පවතින බවත්, තීරණයක් ගැනීමට පෙර සැළකිව යුතු සාකච්ඡාවක් අවශ්‍ය බවත් කාන්තා හා ළමා කටයුතු අමාත්‍යාංශය ප්‍රකාශ කළේය.
කාන්තා හා ළමා කටයුතු නියෝජ්‍ය අමාත්‍ය නාමල් සුදර්ශන පවසන්නේ මෙම පියවර සම්බන්ධයෙන් රජය තුළ තවමත් විධිමත් සාකච්ඡාවක් සිදුවී නොමැති බවයි.
“අපි තවමත් කිසිවක් සාකච්ඡා කර නැහැ. මෙය අදහසක් පමණයි. එය කළ යුතු නම්, අධිකරණ අමාත්‍යාංශය වැනි අනෙකුත් අමාත්‍යාංශ සමඟ සාකච්ඡා කර කළ යුතුයි,” යැයි ඔහු පැවසුවේය.
ඇතැම් රටවල් දැනටමත් ඒ හා සමාන පියවර ක්‍රියාත්මක කර ඇති බව ද ඔහු සඳහන් කළේය.
මීට පෙර, කාන්තා හා ළමා කටයුතු අමාත්‍ය සරෝජා සවිත්‍රි පෝල්රාජ් නිවේදනය කළේ වයස අවුරුදු 12ට අඩු දරුවන් ජංගම දුරකථන ළඟ තබා ගැනීම හෝ භාවිත කිරීම වැළැක්වීමේ තහනමක් හඳුන්වා දීමට රජය සළකා බලමින් සිටින බවයි.
මෙම යෝජනාවේ අරමුණ වන්නේ අධික තිර කාලයෙන් සහ හානිකර අන්තර්ජාල අන්තර්ගතයන්ට නිරාවරණය වීමෙන් දරුවන් ආරක්ෂා කිරීම සහ දරුවන් තුළ සෞඛ්‍ය සම්පන්න සමාජ අන්තර්ක්‍රියා ඇති කිරීම සහ සමස්ත සංවර්ධනය ප්‍රවර්ධනය කිරීමයි.
