October 9, 2024
කුප්‍රකට මහ බැංකු බැඳුම්කර මගඩිය සම්බන්ධයෙන් සිදුකෙරෙන විමර්ශනය සහ රජයේ ස්ථාවරය පිළිබඳ කැබිනට් ප්‍රකාශක ඇමැති විජිත හේරත් ඊයේ(8) පැහැදිලි කිරීමක් කළේය.
ඔහු සඳහන් කළේ රනිල් වික්‍රමසිංහ අදාළ ක්‍රියාවලියේ දී නිදහස් වුයේ ඔහුගේ නිර්දෝෂීභාවය නිසා නොව නීතිමය ක්‍රියාවලිය හේතුවෙන් බවට හිටපු ජනාධිපති මාධ්‍ය අධ්‍යක්ෂවරයාගේ ප්‍රකාශය තමන් ද පිළිගන්නා බවයි.
2015 වසරේ වික්‍රමසිංහ අගමැතිවරයා සහ මුදල් ඇමැතිවරයාව සිටියදී සිදුවූ මහබැංකු බැඳුම්කර මගඩියට අදාළ ඉතිහාසය පිළිබඳ ජනතාව හොඳින් දන්නා බව ද ඔහු අවධාරණය කළේය.
එවක මහ බැංකු අධිපතිවරයා ලෙස කටයුතු කළේ වික්‍රමසිංහගේ සමීපතමයකු වූ අර්ජුන් මහේන්ද්‍රන්ය.
“අර්ජුන් මහේන්ද්‍රන්ගෙන් මේ සම්බන්ධයෙන් කළ විමසීමකට අනුව බැඳුම්කර නිකුත් කිරීම වික්‍රමසිංහගේ උපදෙස් මත සිදු වූවක් බව පාර්ලිමේන්තු පරීක්ෂණයකින් හෙළි වුණා. නමුත් පාර්ලිමේන්තුව විසුරුවා හැර කෝප් කමිටුව විසුරුවා හැර තිබෙනවා. මේ සිදුවීම් පිළිබඳ ජනතාව දන්නවා” යැයි ඇමැති හේරත් ප්‍රකාශ කළේය.
පසුව හිටපු පාර්ලිමේන්තු මන්ත්‍රී සුනිල් හඳුන්නෙත්ති යටතේ තවත් කෝප් කමිටුවක් පිහිටුවන ලද නමුත් බොහෝ සොයාගැනීම් යටපත් වූයේ ‘පාද සටහන් කල්ලිය’ හේතුවෙන් බව ඔහු වැඩිදුරටත් පැහැදිලි කළේය.
මෙම අභියෝග මධ්‍යයේ වුවද වික්‍රමසිංහ උසාවියට කැඳවීමට දැන් කිසිදු බාධාවක් නොමැති බව ඇමැති හේරත් සහතික විය.
“කෝප් කමිටු වාර්තා සහ කොමිෂන් සභා වාර්තා අනුව අපි පරීක්‍ෂණ ආරම්භ කර තිබෙනවා. ප්‍රධාන විත්තිකරුවන් විෂය භාර ඇමැතිවරයා සහ මහ බැංකු අධිපතිවරයා. ඔවුන් නොමැතිව යුක්තිය ඉටු කරන්න බැහැ. ඒ නිසා තිබෙන දත්ත අනුව අපි පරීක්‍ෂණ කරගෙන යනවා. මේ සඳහා යම් කාලයක් ගතවනු ඇත, නමුත් අපි පළිගැනීමක් අපේක්ෂා කරන්නේ නැහැ,” යනුවෙන් ඔහු වැඩිදුරටත් පැවසීය.
