ගුවනේදීම සහායක නියමුවෙකුගෙන් එල්ල වූ පොරෝ ප්‍රහාරයකට ලක්වෙමින් පවා ගුවන් යානය සහ මගීන් බේරාගත් ‘ෆ්ලයිඩුබායි’ සේවයේ ඉන්දීය ජාතික කපිතාන් ස්මිට් මච්ඡාර්ට ඊශ්‍රායල අගමැති බෙන්ජමින් නෙතන්යාහු උණුසුම් ප්‍රශංසා පිරිනමා තිබේ.

ඔහු සමග පැවැත්වූ දුරකථන සංවාදයකදී අගමැති නෙතන්යාහු පවසා ඇත්තේ කපිතාන් මච්ඡාර් ඊශ්‍රායලය, ඉන්දියාව සහ මුළු ලෝකයම ආඩම්බර වූ වීරයෙකු බවයි.

මීට අමතරව, සාමාන්‍යයෙන් ඊශ්‍රායල පුරවැසියන්ට පමණක් පිරිනමනු ලබන ඉහළම ගෞරවය වන ඊශ්‍රායල නිදහස් දින උත්සවයේ නිල සමරු පහන දැල්වීමේ අවස්ථාව සඳහා සහභාගී වන ලෙසද අගමැතිවරයා විසින් නියමු මච්ඡාර්ට සහ ඉන්දීය අගමැති නරේන්ද්‍ර මෝදිට ආරාධනා කරන ලදී.

සැප්තැම්බර් 30 වන දින ඩුබායි සිට ටෙල් අවිව් බලා පියාසර කරමින් තිබූ FZ1073 ගුවන් යානයේදී ඕමාන් ජාතික සහායක නියමු හමාම් අල්-හමාමි විසින් ප්‍රධාන නියමුවාට පහරදී යානය විනාශ කිරීමට උත්සාහ කර තිබුණි.

එකවරම යානය අඩි 17,000ක් පහළට ඇදී ගියද, බරපතල තුවාල ලැබූ නියමු මච්ඡාර් නියමු කුටියේ දොර අගුලු හැරීමට සමත් විය. ඉන්පසු වහා ක්‍රියාත්මක වූ මගීන් නියමු කුටියට කඩා වැදී ප්‍රහාරක සහායක නියමුවා මෙල්ල කර ගනිමින් මහත් විපතක් වළක්වා ගත්තේය.