ශ්‍රී ලංකාවේ විදේශ තානාපති කාර්යාල කිහිපයක් නාමල් රාජපක්ෂ රටේ ඊළඟ ජනාධිපතිවරයා ලෙස හඳුනාගෙන ඇති බව ශ්‍රී ලංකා පොදුජන පෙරමුණේ සාමාජික ජොන්ස්ටන් ප්‍රනාන්දු පැවැසීය.

රත්නපුරයේ පැවැති උත්සවයකදී අදහස් දක්වමින් ජොන්ස්ටන් ප්‍රනාන්දු පැවසුවේ, විශේෂයෙන් ගම් මට්ටමින් නාමල් රාජපක්ෂ සම්බන්ධයෙන් මහජනතාව සාකච්ඡා කරන බවයි.

“පක්ෂයක් ලෙස, නාමල් රාජපක්ෂ මහතාගේ ගමන හොඳින් ඉදිරියට යන බව අපි විශ්වාස කරනවා. ඔහු ඊළඟ ජනාධිපතිවරයා වීම ගැන ගම්වල ජනතාව දැනටමත් කතාකරමින් සිටිනවා” ඔහු පැවැසීය.

නාමල් රාජපක්ෂගේ ඉහළ යන ජනප්‍රියතාවය පිළිබඳ බිය නිසා, රජය බොරු චෝදනා එල්ලකරමින් ඔහු අපකීර්තියට පත්කිරීමට උත්සාහ කරන බවට ජොන්ස්ටන් ප්‍රනාන්දු චෝදනා කළේය.

“ඔවුන් බිය නිසා, නඩු පවරා ඔහුව සිරගත කිරීමට උත්සාහ කරනවා. නාමල් රාජපක්ෂ පැමිණෙන බව ඔවුන් දන්නවා. බුද්ධි අංශ දැනටමත් මේ පිළිබඳව ඔවුන්ගේ වාර්තා ලබා දී තිබෙනවා” ඔහු පැවැසීය.

පසුගිය දිනවල තානාපති කාර්යාල සංචාරවලදී ඔහු හමුවූ රටවල් කිහිපයක නායකයන් සහ රාජ්‍යතාන්ත්‍රිකයින් නාමල් රාජපක්ෂගේ දේශපාලන අනාගතය පිළිබඳව සමාන අපේක්ෂාවන් ප්‍රකාශ කළ බව ද ජොන්ස්ටන් ප්‍රනාන්දු ප්‍රකාශ කළේය.

“විවිධ රටවල නායකයන් මෙය පවසා තිබෙනවා. අපි තානාපති කාර්යාල ගණනාවකට ගියා, එහිදී ඔවුන් කිව්වා ඔබේ නායකයා වන නාමල් රාජපක්ෂ ඊළඟ ජනාධිපතිවරයා කියලා” ජොන්ස්ටන් ප්‍රනාන්දු වැඩිදුරටත් සඳහන් කළේය.