මත්ද්‍රව්‍ය ජාවාරමක් සම්බන්ධයෙන් පොලිසියට තොරතුරු සැපයීම නිසා ඝාතනයට ලක් වූ බව කියන කහවත්තේ තරුණයාගේ අවමංගල්‍යය අද (03) පස්වරුවේ පවුලේ සුසාන භූමියේදී පැවැත්විණි.

මියගිය පුද්ගලයා 22 හැවිරිදි ඉමන්ත සුරන්ජන් වේ.

තරුණයාගේ අවමංගල්‍යයෙන් පසු අද දහවල් පොලිසිය සහ ගම්වැසියන් අතර නොසන්සුන්කාරී තත්වයක් ඇති වී තිබේ.

මෙය සිදු වූයේ ගමේ ආරක්ෂාව සඳහා පොලිස් නිලධාරීන් 150ක් පමණ යොදවා තිබූ පසුබිමකය.

ඝාතනයට ලක් වූ තරුණයාගේ ඥාතීහු සහ ගම්වැසියෝ පොලිසියට දොස්පවරමින් ගල්වලින් පහරදී ඇත.

ප්‍රහාර හමුවේ, පොලිසිය ප්‍රදේශයෙන් පිටව ගොස් පසුව ඒකක යොදවා ගම්වැසියන් පාලනය කිරීම සඳහා කඳුළු ගෑස් ප්‍රහාර එල්ල කර ඇත.

කඳුළු ගෑස් ප්‍රහාරවලින් ගම්වැසියන් කිහිපදෙනෙකු තුවාල ලබා ඇති බව වාර්තා වේ.