මෙරට අඩු පහසුකම් සහිත ප්‍රදේශ හරහා 4G බ්‍රෝඩ්බෑන්ඩ් ප්‍රවේශය පුළුල් කිරීම අරමුණු කරගත් ‘ගමට සන්නිවේදනය’ ජාතික ව්‍යාපෘතිය ක්‍රියාත්මක කිරීම වේගවත් කිරීම සඳහා සංශෝධිත ප්‍රතිපූරණ රාමුවක් අමාත්‍ය මණ්ඩලය විසින් අනුමත කර තිබේ.

2004 අංක 11 දරන මුදල් පනතේ විධිවිධාන යටතේ ශ්‍රී ලංකා විදුලි සංදේශ නියාමන කොමිෂන් සභාව විසින් 2021 සිට ක්‍රියාත්මක කරන ලද මෙම වැඩසටහන, සීමිත හෝ සන්නිවේදන පහසුකම් නොමැති කලාප හඳුනා ගැනීමෙන් සහ ජංගම සේවා සපයන්නන් සමඟ පිරිවැය බෙදා ගැනීමේ යාන්ත්‍රණයක් හරහා විදුලි සංදේශ කුළුණු ඉදිකිරීමෙන් සම්බන්ධතා හිඩැස් පියවා ගැනීමට උත්සාහ කරයි.

තවදුරටත් ආයෝජන දිරිගැන්වීම සඳහා නිර්මාණය කර ඇති නව මාර්ගෝපදේශ විදුලි සංදේශ නියාමන කොමිෂන් සභාව විසින් නිකුත් කර තිබේ.

සංශෝධිත රාමුව යටතේ, සේවා සපයන්නන්ට කුළුණකට උපරිම වශයෙන් රුපියල් මිලියන 35ක් හෝ සන්නිවේදන කුළුණ ඉදිකිරීම සහ අදාළ උපකරණ ස්ථාපනය කිරීමේදී දරන ලද සැබෑ පිරිවැයෙන් 75%ක් ආපසු ගෙවනු ලැබේ.

“සංශෝධිත අරමුදල් ආකෘතිය මගින් රට පුරා 4G බ්‍රෝඩ්බෑන්ඩ් සේවා ව්‍යාප්ත කිරීම වේගවත් කරනු ඇතැයි අපේක්ෂා කරනවා. ග්‍රාමීය හා දුරස්ථ ප්‍රජාවන්ට ඩිජිටල් සම්බන්ධතාවට වේගවත් හා විශ්වාසදායක ප්‍රවේශයක් ලබා ගැනීම සහතික කිරීම අරමුණයි,” යනුවෙන් අමාත්‍ය විජිත හේරත් අඟහරුවාදා පැවති සතිපතා කැබිනට් මාධ්‍ය හමුවේදී පැවසීය.

මේ දක්වා, මෙම ව්‍යාපෘතිය යටතේ සන්නිවේදන කුළුණු 83ක් ඉදිකර ඇති අතර, එමඟින් කලින් පහසුකම් අඩුව තිබූ ප්‍රදේශවල සේවා ආවරණය ලබා ගත හැකි විය.

කෙසේවෙතත්, මෑත කාලීන ආර්ථික අර්බුදය තුළ සේවා සපයන්නන් මුහුණ දෙන මෙහෙයුම් පිරිවැය ඉහළ යෑම සහ ඇතැම් කුළුණුවලින් ආදායම් උත්පාදනය සීමිත වීම හේතුවෙන් ප්‍රගතිය මන්දගාමී විය.

මෙම තීරණය මගින් ප්‍රධාන විදුලි සංදේශ උපකරණවල මිල ගණන් පහත වැටීම සැළකිල්ලට ගෙන කුළුණු ඉදිකිරීම් ක්‍රියාකරුවන් වඩාත් මූල්‍යමය වශයෙන් ශක්‍ය කිරීම අරමුණු කරයි.

මේ සඳහා යෝජනාව ඩිජිටල් ආර්ථික අමාත්‍යවරයා ලෙස ජනාධිපති අනුර කුමාර දිසානායක විසින් ඉදිරිපත් කරන ලදී.