ශ්‍රී ලංකා කැඩෙට් නිලධාරි මොහොමඩ් අනීක් එක්සත් රාජධානියේ සැන්ඩ්හර්ස්ට්හි රාජකීය හමුදා ඇකඩමියේ සති 44ක දැඩි පුහුණු වැඩසටහන සාර්ථකව නිම කිරීමෙන් පසු බලලත් නිලධාරියකු ලෙස නිල වශයෙන් පත් කර තිබේ.

ලන්ඩනයේ ශ්‍රී ලංකා මහ කොමසාරිස් කාර්යාලයට අනුව, කැඩෙට් නිලධාරීන් සඳහා වූ දැඩි පුහුණුවේ කූටප්‍රාප්තිය සනිටුහන් කරමින් ගෞරවනීය සැන්ඩ්හර්ස්ට් සම්ප්‍රදායක් වන Sovereign’s Parade හිදී අධිකාරියට පත් කිරීමේ උත්සවය පැවැත්විණි.

මෙම සුවිශේෂී ජයග්‍රහණය පිළිබඳ කැඩෙට් නිලධාරි අනීක්ට පෞද්ගලිකව සුබ පැතීමට එක්සත් රාජධානියේ ශ්‍රී ලංකා මහ කොමසාරිස් රෝහිත බෝගොල්ලාගම සහභාගී වී ඇත.

මෙම පෙළපාළියට විවිධ රටවලින් කැඩෙට් නිලධාරීන් 209 දෙනෙකු පත් කරන ලද අතර ඔවුන් සියලු දෙනාම ලෝකයේ වඩාත්ම අභියෝගාත්මක හමුදා පුහුණු වැඩසටහනකට භාජනය වී ඇත.

මෙම පෙළපාළිය ඔවුන්ගේ පුහුණුවේ අවසානය පමණක් නොව, අධිකාරී ලත් නිලධාරීන් ලෙස ඔවුන්ගේ හමුදා දිවියේ ආරම්භය ද සනිටුහන් කරයි.