බංග්ලාදේශයේ කාන්තාවන්ට සහ ළමයින්ට එරෙහි හිංසනය ඉහළට

බංග්ලාදේශයේ ‘මනවධිකාර් ෂොංග්ස්ක්‍රිටි ෆවුන්ඩේෂන්’ (MSF) විසින් නිකුත් කරන ලද මාසික නිරීක්ෂණ වාර්තා සලකා බැලීමේදී, ඔක්තෝබර් මාසයේදී මැර ප්‍රහාර හේතුවෙන් සිදු වූ මරණ සහ සමූහ දූෂණ සිදුවීම් කැපී පෙනෙන ලෙස ඉහළ ගොස් ඇත.

පසුගිය සැප්තැම්බර් මාසයේදී මැර ප්‍රහාර හේතුවෙන් පුද්ගල මරණ 23ක් වාර්තා වූ අතර, ඔක්තෝබර් මාසයේදී එම සංඛ්‍යාව 32 දක්වා ඉහළ ගොස් තිබේ. එමෙන්ම සමූහ දූෂණ සිදුවීම් 12 සිට 21 දක්වා 75%ක අගයකින් වර්ධනය වී ඇත. සොරකම් කිරීම් සම්බන්ධ චෝදනා, වචන හුවමාරු, කප්පම් ගැනීම්, ඉඩම් ආරවුල්, කොල්ලකෑම් සහ මත්ද්‍රව්‍ය සම්බන්ධ ආරවුල් මෙම හිංසනයන්ට මුල් වී ඇති බව MSF සංවිධානය පවසයි.

ස්ත්‍රී-පුරුෂ සමාජභාවීය හිංසනය මෙන්ම කාන්තාවන්ට සහ ළමයින්ට එරෙහි හිංසනය පිළිබඳ වෙනම වාර්තාවකට අනුවද, සමූහ දූෂණ සිද්ධීන් සැප්තැම්බර් මාසයේ පැවති 12 සිට ඔක්තෝබර් මාසයේදී 21 දක්වා 75%කින් ඉහළ ගොස් ඇත.

සමස්තයක් වශයෙන් කාන්තාවන්ට සහ ළමයින්ට එරෙහි හිංසන සිදුවීම් 354 සිට 357 දක්වාත්, ලිංගික වධහිංසා සහ අපයෝජන සිදුවීම් 16 සිට 25 දක්වාත් ඉහළ ගොස් තිබේ. එමෙන්ම ළමුන් සහ යෞවන යෞවනියන් 20 දෙනෙකු ඇතුළුව කාන්තාවන් සහ ළමුන් 84 දෙනෙකු ඝාතනය වී ඇති බව MSF වාර්තා කරයි.

පිරිමි ළමුන් සම්බන්ධ ලිංගික අපයෝජන සිදුවීම් 7 සිට 10 දක්වා ඉහළ ගොස් ඇති අතර, අපරාධ සම්බන්ධයෙන් නීති විරෝධී ලෙස සිදු කළ සාකච්ඡා/සමථ මණ්ඩල සාකච්ඡා 1 සිට 6 දක්වා වැඩි වී තිබේ.

මීට අමතරව, අත්හැර දමා ගොස් සිටි බිළිඳුන් 6 දෙනෙකු සොයාගෙන ඇති අතර, ඉන් පස්දෙනෙකු ජීවත්ව සිටියදී බේරා ගැනීමට හැකි වී ඇත.