අන්තර්ජාතික මූල්‍ය අරමුදලේ (IMF) විස්තීර්ණ අරමුදල් පහසුකම යටතේ ලැබීමට නියමිත ඇමරිකානු ඩොලර් මිලියන 695 ද ඇතුළුව, ආසියානු සංවර්ධන බැංකුව සහ ලෝක බැංකුව වෙතින් මේ වසරේදී ඇමරිකානු ඩොලර් බිලියනයක පමණ මූල්‍ය ආධාර ප්‍රමාණයක් රජය අපේක්ෂා කරන බව බලශක්ති අමාත්‍ය අනුර කරුණාතිලක පවසයි.

එහෙත්, රටේ ආර්ථිකය ස්ථාවර කිරීම සඳහා එම මුදල ප්‍රමාණවත් නොවිය හැකි බවත්, එම නිසා සහනාධාර කපාහැරීමට සහ බලශක්ති මිල ගණන් ඉහළ නැංවීමට රජයට සිදුවනු ඇති බවත් අමාත්‍යවරයා සඳහන් කරයි.

රටේ විදේශ විනිමය සංචිත සුරක්ෂිත කර ගැනීම සඳහා ඉදිරි මාස කිහිපය තුළ රජයට දැඩි මූල්‍ය ක්‍රියාමාර්ග ගැනීමට සිදුවනු ඇතැයි ද අමාත්‍යවරයා පෙන්වාදෙයි.

ඒ අනුව, දැනට මාසිකව ලබාදෙන රුපියල් මිලියන 15ක ලංකා ඛනිජ තෙල් නීතිගත සංස්ථාවේ ඉන්ධන සහනාධාරය ලබන සැප්තැම්බර් මාසයෙන් අවසන් වන බවත්, සංස්ථාව තවදුරටත් ණය බරින් මිරිකීම වැළැක්වීම සඳහා ඉන්ධන මිල ඉහළ දැමීම අත්‍යවශ්‍ය වනු ඇති බවත් ඔහු සඳහන් කරයි.

කෙසේවෙතත්, මසකට විදුලි ඒකක 180 දක්වා පරිභෝජනය කරන පාරිභෝගිකයන් සඳහා වන විදුලි සහනාධාරය අඛණ්ඩව ක්‍රියාත්මක වන නමුත්, එම ක්ෂේත්‍රය සඳහා මින් ඉදිරියට වෙනත් කිසිදු සහනයක් ලබානොදෙන බව අමාත්‍යවරයා ප්‍රකාශ කරයි.

එසේම, තෝරාගත් විශේෂිත කණ්ඩායම් වෙනුවෙන් ක්‍රියාත්මක වන ‘අස්වැසුම’ සුභසාධන වැඩසටහන ද අඛණ්ඩව ඉදිරියට පවත්වාගෙන යනු ඇත.

“ඉදිරි මාස කිහිපය තුළ අපට විදේශීය සෘජු ආයෝජන ක්ෂේත්‍රය ශක්තිමත් කිරීමටත්, අත්‍යවශ්‍ය නොවන භාණ්ඩ ආනයනය සීමා කිරීමටත් සිදුවෙනවා,” යැයි ද අමාත්‍ය කරුණාතිලක වැඩිදුරටත් සඳහන් කරයි.

ඇමතිවරයා ‘Sunday Times’ පුවත්පතට මෙම අදහස් පළකර ඇත.