සරම්ප රෝග ව්‍යාප්තියකට හේතු විය හැකි පරිදි පවතින සරම්ප එන්නත් හිඟය පිළිබඳව, අන්තර්වාර රජයට ලිඛිතව මෙන්ම සෞඛ්‍ය අමාත්‍යාංශයේ නිලධාරීන් සමඟ පැවැති සාකච්ඡාවලදී ද කිහිප වතාවක්ම අනතුරු ඇඟවූ බව යුනිසෙෆ් සවිධානයේ බංග්ලාදේශ නියෝජිතායතනය පවසයි.

මෙම කරුණ සම්බන්ධයෙන් එම ආයතනය සෞඛ්‍ය බලධාරීන් වෙත ලිපි පහක් හෝ හයක් පමණ යවා ඇති අතර, අන්තර්වාර රජයේ ධූර කාලය තුළ පැවැති රැස්වීම් 10කදී මේ පිළිබඳව සාකච්ඡා කළ බව බංග්ලාදේශයේ යුනිසෙෆ් නියෝජිත රේනා ෆ්ලවර්ස් ඩකා හි පිහිටි තම කාර්යාලයේ පැවැති මාධ්‍ය හමුවකදී වාර්තාකරුවන්ට පැවසුවාය.

“එන්නත් හිඟය රෝග ව්‍යාප්තියකට මඟ පෑදිය හැකි බවට 2024 වසරේ සිටම අපි රජයට අනතුරු අඟවමින් සිටියා,” යනුවෙන් ඇය එහිදී පැවසුවාය.

එමන්ම ඇය වැඩිදුරටත් කියා සිටියේ, 2024 වසරේ සිට 2025 සහ 2026 වසර දක්වාම, මෙය බරපතල ගැටලුවක් බවත් එන්නත් සඳහා ඇණවුම් ලබා දිය යුතු බවත් පෙන්වා දෙමින් ලිපි යොමු කළ අතර විවිධ රැස්වීම් 10ක් පැවැත්වූ නමුත් බලධාරීන්ට එය කිරීමට නොහැකි බවයි.

පසුගිය වසරේ අගෝස්තු මාසයේදී බංග්ලාදේශයේ සංචාරයක නිරත වූ යුනිසෙෆ් නියෝජ්‍ය විධායක අධ්‍යක්ෂ ටෙඩ් චයිබන් ද විදේශ කටයුතු අමාත්‍යාංශය සමඟ පැවැති සාකච්ඡාවකදී මෙම එන්නත් හිඟය පිළිබඳ ගැටලුව මතු කළ බව ඇය පැවසුවාය.

“එන්නත් ඇණවුම් කිරීමට අපොහොසත් වීම සෞඛ්‍ය අමාත්‍යාංශය සතුව මුදල් නොමැති වීම නිසා සිදු වූවක් නෙවෙයි. ඒ සඳහා අවශ්‍ය ප්‍රතිපාදන මුදල් අමාත්‍යාංශය විසින් සපයා තිබුණා. එම ප්‍රතිපාදන අයවැය තුළත් ඇතුළත් කර තිබුණා. ප්‍රසම්පාදන කටයුතු සිදු කරන්නේ කෙසේද යන්න පිළිබඳව ගත් තීරණ හේතුවෙන් තමයි මේ ප්‍රමාදය ඇති වුණේ. ඒ වගේම, ඉදිරියේදී මේ සම්බන්ධයෙන් පරීක්ෂණයක් පැවැත්වීමට නියමිතයි, මම එය ඉතා අගය කොට සලකනවා.” යනුවෙන ද ඇය වැඩිදුරටත් පැහැදිලි කළාය.