මත්තල රාජපක්ෂ අන්තර්ජාතික ගුවන්තොටුපළ වෙත දේශීය හා විදෙස් ආයෝජකයන් ආකර්ෂණය කර ගැනීම සඳහා වරාය හා සිවිල් ගුවන් සේවා අමාත්‍යාංශය විධිමත් මෙහෙයුමක් දියත් කර තිබේ.

එම අමාත්‍යාංශයට අනුව, ශ්‍රී ලංකා ආයෝජන මණ්ඩලය මෙම ආයෝජන අවස්ථාව සඳහා පහසුකම් සපයන්නකු ලෙස සියලුම කොටස්කරුවන් සහ අනාගත ආයෝජකයන් සමඟ කටයුතු කරනු ඇත.

ගුවන්තොටුපළ සහ ගුවන් සේවා සමාගම වෙනුවෙන් ක්‍රියාකරමින්, පුළුල් පරාසයක වාණිජ අවස්ථා ආවරණය වන පරිදි කැමැත්ත ප්‍රකාශ කිරීමේ ක්‍රියාවලිය අමාත්‍යාංශය විසින් ආරම්භ කර තිබේ.

අභ්‍යන්තර පරිමිතිය තුළ සිවිල් ගුවන්තොටුපළ මෙහෙයුම් ආවරණය කරන ගුවන පැත්තේ /ගුවන්තොටුපළ මෙහෙයුම් සහ ගුවන්තොටුපළේ පිටත සහ අභ්‍යන්තර පරිමිතීන් තුළ ක්‍රියාකාරකම් ඇතුළත් ගොඩබිම් පැත්තේ මෙහෙයුම් ලෙස එම කැමැත්ත ප්‍රකාශ කිරීමේ යෝජනා කැඳවීම කොටස් දෙකකට බෙදා ඇත.

කැමැත්ත ප්‍රකාශ කිරීමේ ක්‍රියාවලිය දේශීය සහ විදෙස් ආයතන දෙකටම විවෘතය.

2026 ජුනි 8 වැනිදා දක්වා වැඩ කරන දිනවල පෙ.ව. 9.00 සිට ප.ව. 2.30 දක්වා එම ලේඛන නොමිලේ ලබා ගත හැකිය.

ලේඛන www.airport.lk වෙබ් අඩවියෙන් ද බාගත කළ හැකිය.