පොළොන්නරුවේ වැලිකන්ද ප්‍රදේශයේදී තියුණු ආයුධයකින් පොලිස් නිලධාරීන්ට පහරදීමට උත්සාහ කළ බව කියන 28 හැවිරිදි පුද්ගලයෙකු පොලීසිය විසින් වෙඩි තබා ඝාතනය කර තිබේ.

රථවාහන රාජකාරියේ යෙදී සිටි නිලධාරීන් අද දහවල් වැලිකන්ද ප්‍රදේශයේදී යතුරුපැදියකින් ගමන් කරමින් සිටි පුද්ගලයින් තිදෙනෙකුට නතර කරන ලෙස නියෝග කළ බව පොලිසිය සඳහන් කළේය.

කෙසේවෙතත්, යතුරුපැදිකරු එම නියෝගයට අනුකූල නොවී පළාගොස් ඇත.

පොලිස් නිලධාරීන් සැකකරු ඔහුගේ නිවසට ලුහුබැඳ ගිය විට, ඔහු ඔවුන්ට පිහියකින් පහරදීමට උත්සාහ කළ බව කියනු ලැබේ.

එහිදී පොලිසිය වෙඩිතබා ඇත.

සැකකරුගේ කකුළට සහ පපුවට වෙඩි වැදී තුවාල ලබා රෝහල්ගත කර ඇති අතර එහිදී ඔහු පසුව මියගිය බව පොලිසිය පැවසීය.

සැකකරුට මීට පෙර මත්ද්‍රව්‍ය සම්බන්ධ නඩු හතක් සම්බන්ධයෙන් චෝදනා එල්ල වී ඇති බවත්, ඔහුට එරෙහිව තවත් අපරාධ නඩු දෙකක් දැනට අධිකරණය හමුවේ විභාග වෙමින් පවතින බවත් පොලිසිය වැඩිදුරටත් පැවසීය.

යතුරුපැදියේ ගමන් කළ අනෙක් පුද්ගලයින් දෙදෙනා සොයා පරීක්ෂණ ආරම්භ කර ඇත.