June 10, 2025
උතුරු පළාතේ ප්රවාහන යටිතල පහසුකම් නංවාලීමේ වැදගත් පියවරක් ලෙස ප්රවාහන අමාත්යාංශය සහ දුම්රිය දෙපාර්තමේන්තුව එක්ව කන්කසන්තුරේ දුම්රිය මාර්ගය එම ප්රදේශයේ දැනට සංවර්ධනය වෙමින් පවතින නව කර්මාන්තපුරයක් දක්වා දීර්ඝ කිරීමට කටයුතු කරමින් සිටියි.
එමගින් මගී ගමන් සහ භාණ්ඩ ප්රවාහන සේවා යන අංශ දෙකෙහිම සංවර්ධනය අපේක්ෂා කෙරේ.
දශක තුනක් පුරා පැවැති යුද ගැටුම්වලදී දැඩි ලෙස හානියට පත් කන්කසන්තුරේ දුම්රිය ස්ථානය මීට වසර දහයකට පෙර ප්රතිසංස්කරණය කර මහජනතාව සඳහා විවෘත කෙරිණි.
ප්රවාහන අමාත්ය බිමල් රත්නායක ඊයේ එහි නිරීක්ෂණ චාරිකාවක නිරත වූ අතර, දුම්රිය ස්ථානයේ පහසුකම් තවදුරටත් වැඩිදියුණු කිරීමට සැලසුම් කර ඇති බවද ඔහු ප්රකාශ කළේය.
සිය සංචාරයේදී අමාත්යවරයා පෙන්වාදුන්නේ, දුම්රිය මාර්ගය ප්රතිසංස්කරණය කිරීමෙන් මගීන්ගේ සම්බන්ධතා වැඩිදියුණු වී ඇතත්, භාණ්ඩ හැසිරවීමට සහ ගබඩා කිරීමට නිසි යටිතල පහසුකම් දුම්රිය ස්ථානයේ තවමත් නොමැති බවයි.
එහි භාණ්ඩ ප්රවාහන කටයුතු ආරම්භ කර ඇති අතර එමඟින් මහජනතාවට සැලකිය යුතු පහසුවක් සහ ලාභදායී සේවාවක් හිමිවනු ඇති බවත්, එම ස්ථානයේ භාණ්ඩ නිසි ලෙස ලබාගැනීමට සහ ගබඩා කිරීමට දැනට පහසුකම් නොමැති බැවින් එම අඩුපාඩු සඳහා වහාම විසඳුම් ලබාදීමට පියවර ගන්නා බවත් අමාත්යවරයා පැවැසීය.
විශේෂයෙන්ම යාපනය අන්තර්ජාතික ගුවන් තොටුපොළ වෙත දිවෙන සියලුම මාර්ග සම්පූර්ණයෙන් ක්රියාත්මක වීමත් සමඟ දුම්රිය සහ බස් සේවා ඒකාබද්ධ කිරීමේ වැදගත්කම ද ඇමැතිවරයා අවධාරණය කළේය.
මගීන්ට සහ ව්යාපාරිකයන්ට කාර්යක්ෂම සේවා සැපයීම සඳහා සම්බන්ධීකරණ ප්රවාහන පද්ධතියක් ස්ථාපිත කිරීම ඉතා වැදගත් බව ද ඔහු වැඩිදුරටත් පැවැසීය.
