කිලිනොච්චි දිස්ත්‍රික් සංවර්ධන කමිටු රැස්වීමක් අතරතුර පාර්ලිමේන්තු මන්ත්‍රී අර්චුනා රාමනාදන් සහ ධීවර අමාත්‍ය රාමලිංගම් චන්ද්‍රසේකර් අතර දැඩි නොසන්සුන්කාරී තත්ත්වයක් හටගෙන තිබේ.

රැස්වීමේ ප්‍රශ්න ඇසීම සඳහා වෙන් කර තිබූ කාලවේලාව තුළ පාර්ලිමේන්තු මන්ත්‍රී අර්චුනා රාමනාදන් විසින් පෙත්සම් කිහිපයක් කියවීමට පටන් ගැනීමත් සමඟ මෙම උණුසුම් තත්ත්වය ආරම්භ වී ඇත.

මන්ත්‍රීවරයාගේ මෙම ක්‍රියාකලාපයට රැස්ව සිටි සෙසු පිරිස් ද කෑගසමින් සිය විරෝධය පළකර තිබේ. එහිදී මන්ත්‍රීවරයා විසින් අමාත්‍ය රාමලිංගම් චන්ද්‍රසේකර්ට සහ දිස්ත්‍රික් ලේකම්වරයාට ‘හොරුන්’ යැයි පවසමින් සෘජුවම චෝදනා එල්ල කර ඇත.

තත්ත්වය තවදුරටත් උග්‍ර වෙමින්, අර්චුනා රාමනාදන් මන්ත්‍රීවරයා තම අසුනෙන් නැගිට ගොස් රාමලිංගම් චන්ද්‍රසේකර් වෙත පහරදීමට ද උත්සාහ කර තිබේ.

කෙසේවෙතත්, එම අවස්ථාවේදී රැස්වීම් ශාලාවේ සිටි පොලිස් නිලධාරීන් වහාම මැදිහත් වී මන්ත්‍රීවරයාව වළක්වා ගැනීමට කටයුතු කර ඇත.

මෙම ගැටුම හේතුවෙන් එදින දිස්ත්‍රික් සංවර්ධන කමිටු රැස්වීමේ කටයුතු ද අතරමඟ නතර කිරීමට සිදු විය.