හිටපු සෞඛ්‍ය ඇමැති කෙහෙළිය රඹුක්වැල්ල විසින් ඉවත් කරන ලද ශ්‍රී ලංකා වෛද්‍ය සභාවේ(SLMC) හිටපු සාමාජික මහාචාර්ය ජයන්ත ජයවර්ධන එම සභාවේ සාමාජිකයෙකු ලෙස යළි පත්කර තිබේ.

සෞඛ්‍ය අමාත්‍ය වෛද්‍ය රමේෂ් පතිරණ විසින් නැවත මෙම පත්කිරීම සිදුකර ඇත.

ආඥාපනත අනුව ස්වේච්ඡාවෙන් ඉල්ලා අස්වීම හෝ ඉවත් කිරීම හැර, නැවත පත්කරන ලද සාමාජිකයාගේ නිල කාලය වසර පහක් සඳහා නියම කෙරේ.

නැවත සාමාජිකත්වයේ පිහිටුවීම සම්බන්ධයෙන් කෘතඥතාව පළකරණ මහාචාර්ය ජයවර්ධන, ඔහුගේ පෙර ඉවත්කිරීම නීති විරෝධී සහ අත්තනෝමතික බව පෙන්වාදී තිබේ. ඔහු අද නැවත වැඩ භාරගත්තේය.

සාධාරණ හේතු දැක්වීමකින් තොරව පසුගිය ඔක්තෝම්බර් මාසයේදී SLMC උප සභාපති ධූරයෙන් මහාචාර්ය ජයවර්ධන ඉවත්කරන ලදී.

හිටපු සෞඛ්‍ය ඇමැතිවරයාගේ තීරණය වලංගු තර්කයක් නොමැති සහ ස්වභාවික යුක්තියේ මූලධර්ම උල්ලංඝනය කිරීමක් ලෙස විවේචනයට ලක්විය.