පළාත් පාලන මැතිවරණයෙන් තේරී පත් වූ මන්ත්‍රීවරුන්ට මත්ද්‍රව්‍ය ජාවාරම්කරුවන් අරමුදල් සපයන බවට තමාට තොරතුරු ලැබී ඇති බවත්, සංවිධානාත්මක අපරාධ කල්ලි දේශපාලන ක්‍රියාවලියට ඇතුළුවීම පිළිබඳ විමර්ශනය කරන ලෙස පොලිසියෙන් ඉල්ලා සිටින බවත් ජනාධිපති අනුර කුමාර දිසානායක පැවසීය.

ජනාධිපති ලේකම් කාර්යාලයේදී පැවති පොලිස් දෙපාර්තමේන්තුව සහ නීතිපති දෙපාර්තමේන්තුව ඇතුළු ආයතනවල ජ්‍යෙෂ්ඨ නිලධාරීන්ගේ රැස්වීමක් අමතමින් ජනාධිපති දිසානායක පැවසුවේ, ප්‍රමුඛ පෙළේ මත්ද්‍රව්‍ය ජාවාරම්කරුවන් කිහිප දෙනෙකු පළාත් පාලන මැතිවරණයට තරඟ කළ අපේක්ෂකයන්ට අරමුදල් සපයා ඇති බවත්, එම අපේක්ෂකයන්ගෙන් සැළකිව යුතු සංඛ්‍යාවක් තේරී පත් වී ඇති බවටත් චෝදනා කරමින් තමාට ලැබුණු තොරතුරු පිළිබඳ කණස්සල්ලට පත්ව සිටින බවයි.

මෙය භයානක අනාගතයක ලකුණක් ලෙස ජනාධිපතිවරයා විස්තර කර තිබේ.

අපරාධ කල්ලිවලට දේශපාලන අනුග්‍රහය අහිමි වී ඇති අවස්ථාවක, ඔවුන්ට පක්ෂපාතී දේශපාලනඥයන් පත් කිරීමෙන් ඔවුන් තම නීති විරෝධී ක්‍රියාකාරකම් දිගටම කරගෙන යෑමට උත්සාහ කරන බව ජනාධිපතිවරයා ප්‍රකාශ කළේය.

ඉහළ පෙළේ පරීක්ෂණ පැවැත්වීමේදී සහ ඒවාට අදාළ චෝදනා ගොනු කිරීමේදී පොලිසිය මුහුණ දෙන දුෂ්කරතා සාකච්ඡා කිරීම සඳහා මෙම රැස්වීම පැවැත්විණි.

නීතිපති පාරින්ද රණසිංහ සහ නීතිපති දෙපාර්තමේන්තුවේ ජ්‍යෙෂ්ඨ නිලධාරීහු ජ්‍යෙෂ්ඨ පොලිස් නිලධාරීන් සමඟ සාකච්ඡාවට සහභාගී වූහ.

ප්‍රාදේශීය දේශපාලනඥයන්ට සහාය දක්වන අපරාධ කල්ලි පිළිබඳ චෝදනා වහාම විමර්ශනය කිරීමට සහ ප්‍රමුඛ ජාවාරම්කරුවන්ට එරෙහිව නඩු කඩිනම් කිරීමට ජනාධිපතිවරයා මහජන ආරක්ෂක අමාත්‍ය ආනන්ද විජේපාල සහ මහජන ආරක්ෂක අමාත්‍යාංශ ලේකම් රවී සෙනෙවිරත්න යන අයට උපදෙස් දී ඇති බව ද වාර්තා වේ.

සංවිධානාත්මක අපරාධ විභාග කිරීම සඳහා විශේෂිත අධිකරණ පිහිටුවීමට ජ්‍යෙෂ්ඨ අතිරේක සොලිසිටර් ජනරාල් රොහන්ත අබේසූරිය යෝජනා කර තිබිණි.

බරපතළ සංවිධානාත්මක අපරාධ සම්බන්ධයෙන් පොලිසියට තොරතුරු ලැබුණු විට, ඔවුන් වහාම නීතිපතිවරයාට දැනුම් දිය යුතු බවත්, පරීක්ෂණ ආරම්භ කළ යුතු බවත්, අධිකරණයට සාක්ෂි ඉදිරිපත් කළ යුතු බවත් ඔහු පැවසීය.

අතිරේක සොලිසිටර් ජනරාල් දිලීප පීරිස් පොලිසිය සහ නීතිපති දෙපාර්තමේන්තුව අතර සම්බන්ධතාවයේ බිඳවැටීම පෙන්වා දුන්නේය.

සම්බන්ධතාව නැවත ගොඩනඟා ශක්තිමත් කරන්නේ කෙසේද යන්න පිළිබඳ රැස්වීමේදී දීර්ඝ ලෙස සාකච්ඡා කළ බව වාර්තා වේ.

මේ අතර, මහජන ආරක්ෂක අමාත්‍යාංශ ලේකම් රවී සෙනෙවිරත්න සඳහන් කළේ විමර්ශනවල අඩුපාඩු සඳහා හේතුවක් වූයේ දක්ෂ නිලධාරීන් 400 කට වැඩි පිරිසක් අතීතයේ විවිධ ක්ෂේත්‍රවලට මාරුකර තිබීම බවයි.

මෙම තත්ත්වය නිවැරදි කිරීමට පියවර ගනිමින් සිටින බව ඔහු පැවසීය.

සාකච්ඡාවට බඳුන් වූ තවත් විෂයයක් වූයේ මිග් ගනුදෙනුව වැනි අන්තර්ජාතික මට්ටමින් සිදු වූ වංචා සම්බන්ධයෙන් නඩු පැවරීමේ ප්‍රමාදයයි ..

අන්‍යෝන්‍ය නීති සහයෝගීතාව (MLA) යටතේ සමහර රටවල් අපේක්ෂිත සහාය ලබා නොදෙන බවත්, එය ප්‍රමාදයන්ට හේතු වන බවත් එහිදී පෙන්වා දෙන ලදී.

අධිකරණ අමාත්‍ය හර්ෂණ නානායක්කාර පැවසුවේ, විදේශ අමාත්‍යාංශය සමඟ සාකච්ඡා කිරීමෙන් පසු, නිසි ආකාරයෙන් එම සහයෝගීතාව ලබා ගැනීම සඳහා රටේ තානාපතිවරුන් යොදා ගත හැකි යාන්ත්‍රණයක් අධිකරණ අමාත්‍යාංශයට සකස් කළ හැකි බවයි.

The Sunday Times