ශ්‍රී ලංකා ක්‍රිකට් ආයතනය සඳහා යෝජිත නව ව්‍යවස්ථාව මගින් තේරී පත්වන සාමාජිකයන් හත්දෙනකු (7) සහ ස්වාධීනව පත්කරනු ලබන සාමාජිකයන් හත්දෙනකුගෙන් (7) සමන්විත 14 දෙනකුගෙන් යුත් පාලක මණ්ඩලයක් ස්ථාපිත කිරීමට නියමිත බව ශ්‍රී ලංකා ක්‍රිකට් පරිවර්තන කමිටුව පවසයි.

ශ්‍රී ලංකා ක්‍රිකට් ආයතනය සඳහා වඩාත් ස්වාධීන, වෘත්තීය සහ ස්ථාවර පාලන ව්‍යුහයක් නිර්මාණය කිරීම මෙම ප්‍රතිසංස්කරණවල අරමුණ බව පරිවර්තන කමිටුවේ සභාපති ඉරාන් වික්‍රමරත්න සහ ක්‍රිකට් කමිටු සභාපති සිදත් වෙත්තිමුණි සඳහන් කළහ.

යෝජිත නව ක්‍රමය යටතේ පත්කරනු ලබන අධ්‍යක්ෂවරුන් හත්දෙනා තෝරාගනු ලබන්නේ පිළිගත් වෘත්තීය ආයතනවල නියෝජිතයන් සහ එක් රජයේ නියෝජිතයකුගෙන් සමන්විත ස්වාධීන නාමයෝජනා ක්‍රියාවලියක් මගිනි.

ශ්‍රී ලංකා නීතිඥ සංගමය, ශ්‍රී ලංකා ගණකාධිකාරීවරුන්ගේ ආයතනය සහ ලංකා වාණිජ මණ්ඩලය යන ආයතන මේ සඳහා ඇතුළත් වේ.

පත්කරනු ලබන තනතුරු සඳහා ඕනෑම පාර්ශ්වයකින් නාමයෝජනා ඉදිරිපත් කළ හැකි අතර, අපේක්ෂකයන් නියමිත ක්ෂේත්‍රයන්හි ප්‍රගුණතාවයක් දැක්වීම අනිවාර්ය වේ.

ගිණුම්කරණය සහ මුදල්, නීතිය, අලෙවිකරණය, තොරතුරු තාක්ෂණය සහ ක්‍රිකට් පරිපාලනය යන ක්ෂේත්‍රවල සුදුසුකම් හෝ පළපුරුද්ද ඇති වෘත්තිකයන් මෙලෙස පත්කිරීමට අපේක්ෂිතය. මින් අවම වශයෙන් එක් තනතුරක්වත් නියමිත කාලයක් ක්‍රිකට් ක්‍රීඩාවෙන් විශ්‍රාම ගොස් සිටින ක්‍රිකට් ක්‍රීඩකයකු සඳහා වෙන්කරනු ඇත.

ශ්‍රී ලංකා ක්‍රිකට් සභාපතිවරයා තෝරාගනු ලබන්නේ තේරීපත්වන සාමාජිකයන් අතරින් නොව, පත්කරනු ලබන අධ්‍යක්ෂවරුන් අතුරිනි. පරිපාලනයේ ස්වාධීනත්වය සුරැකීම මෙහි ප්‍රධාන අරමුණයි.

මණ්ඩලයේ තිරසාරභාවය තහවුරු කිරීම සහ මුළු මණ්ඩලයම එකවර වෙනස්වීම වැළැක්වීම සඳහා පත්කරන ලද අධ්‍යක්ෂවරුන් චක්‍රීය පදනම මත සේවය කරනු ඇත. මණ්ඩල සාමාජිකයන්ට සේවය කළ හැක්කේ වසර හතර බැගින් වූ ධූර කාල දෙකක් (2) සඳහා පමණි.

ඉතිරි අධ්‍යක්ෂවරුන් හත්දෙනා තෝරාගනු ලබන්නේ ක්‍රිකට් ක්‍රීඩාවට දක්වන දායකත්වය සහ දක්ෂතාවලට සෘජුවම සම්බන්ධ වන සංශෝධිත ඡන්ද ව්‍යුහයක් මගිනි.

දේශීය ප්‍රමුඛ පෙළ තරගාවලිවල තරග වදින කණ්ඩායම් වෙත ඡන්ද හිමිකම හිමිවන අතර පළාත් ක්‍රිකට් සංගම් ද නියෝජනය වේ. යම් සමාජයක් ප්‍රමුඛ පෙළ තරගාවලියකින් පහත වැටුණහොත් එම සමාජයට ඡන්ද හිමිකම අහිමි විය හැක.

මෑතකදී ඡන්ද 59 දක්වා අඩුකරන ලද වත්මන් ඡන්ද ව්‍යුහය, ඉදිරියේදී ඡන්ද 39 දක්වා තවදුරටත් අඩුකිරීමට අපේක්ෂා කෙරේ.

පාලක මණ්ඩලය සහ ජ්‍යෙෂ්ඨ කළමනාකාරීත්වය අතර පැහැදිලි වගකීම් බෙදීමක් සිදුවනු ඇත. පාලක මණ්ඩලය පාලනය, ප්‍රතිපත්ති, පාරදෘශ්‍යභාවය සහ වගවීම කෙරෙහි අවධානය යොමුකරන අතර, කළමනාකාරීත්ව කණ්ඩායම ක්‍රීඩාවේ එදිනෙදා පරිපාලන කටයුතු භාරව කටයුතු කරනු ඇත.

කෙටුම්පත් කරන ලද ව්‍යවස්ථාව මේ වන විටත් ක්‍රීඩා අමාත්‍යවරයා වෙත බාර දී ඇත. එය නීතිපතිවරයා සහ නීති කෙටුම්පත් සම්පාදක දෙපාර්තමේන්තුව විසින් සමාලෝචනය කිරීමෙන් අනතුරුව පරිවර්තනය කර, කැබිනට් අනුමැතිය සඳහා ඉදිරිපත් කර ගැසට් කරනු ලැබේ.

ගැසට් කිරීමෙන් පසු, යෝජිත පනත් කෙටුම්පත පළමු වර කියවීම සඳහා පාර්ලිමේන්තුවට ඉදිරිපත් කෙරේ. ඉන්පසු ඕනෑම පුරවැසියකුට එය ශ්‍රේෂ්ඨාධිකරණයේ අභියෝගයට ලක්කිරීමට සති දෙකක කාලයක් හිමි වේ.

ශ්‍රේෂ්ඨාධිකරණය පැය 48 ත් 72 ත් අතර කාලයක් තුළ සිය තීරණය ලබා දීමට නියමිත අතර, ඉන්පසු දෙවැනි සහ තෙවැනි වර කියවීම් සඳහා දින නියම කෙරේ. පාර්ලිමේන්තු අනුමැතිය ලැබීමෙන් පසු නව ව්‍යවස්ථාව නීතියක් බවට පත්වනු ඇත.

මෙම ප්‍රතිසංස්කරණ සඳහා සහයෝගය ලබාගැනීම සඳහා විපක්ෂ නියෝජිතයන් ඇතුළු දේශපාලන නායකයන් ද දැනුවත් කිරීමට නියමිතය. මෙම ලේඛනය තවමත් කෙටුම්පතක් පමණක් වන අතර, පාර්ශ්වකරුවන් සමඟ කෙරෙන සාකච්ඡා සහ නීති සම්පාදනය කිරීමේ ක්‍රියාවලියේදී යම් යම් සංශෝධනවලට ලක්විය හැකි බව කමිටුව අවධාරණය කළේය.

අන්තර්ජාතික ක්‍රිකට් කවුන්සිලය (ICC) මගින් මේ සඳහා විශේෂිත කාලසීමාවක් පනවා නොමැති වුවද, හැකි ඉක්මනින් නව පාලක මණ්ඩලයක් තෝරා පත්කර ගැනීමේ මැතිවරණය පවත්වන ලෙස ශ්‍රී ලංකාවෙන් ඉල්ලා සිටින බව ද කමිටුව වැඩිදුරටත් පැවසීය.