June 4, 2026
මැදපෙරදිග කලාපයේ පවතින උත්සන්න වූ ගල්ෆ් අර්බුදය හේතුවෙන් ගෝලීය බොරතෙල් සැපයුමට දැඩි බාධා එල්ල වී ඇති පසුබිමක, ඉන්දියාව සහ වෙනිසියුලාව අතර බලශක්ති ක්ෂේත්රයේ සබඳතා තවදුරටත් ශක්තිමත් කර ගැනීමට දෙරටේම අවධානය යොමු වී ඇත.
මෙම සුවිශේෂී සබඳතාව දෙරටටම අන්යෝන්ය වශයෙන් වාසිදායක වන පරිපූර්ණ සහයෝගීතාවක් ලෙස නවදිල්ලිය හඳුන්වා දෙයි.
වෙනිසියුලාවේ අන්තර්කාලීන ජනාධිපතිනි ඩෙල්සි රොඩ්රිගස් මේ වන විට ඉන්දියාවේ විශේෂ නිල සංචාරයක නිරත වෙමින් සිටින අතර, ඇය ඉන්දීය අග්රාමාත්ය නරේන්ද්ර මෝදි මහතා හමුවී ඉහළ මට්ටමේ සාකච්ඡාවල නිරත වූවාය.
මෙම සාකච්ඡාවල ප්රධාන අවධානය යොමු වූයේ තෙල් සහ ගෑස් ව්යාපෘතිවල ඉහළ සහ පහළ මට්ටම්වල බලශක්ති සහයෝගීතාව පුළුල් කර ගැනීම කෙරෙහි ය.
මෙම නායක හමුවෙන් අනතුරුව පැවැති මාධ්ය හමුවකදී අදහස් දැක්වූ ඉන්දීය විදේශ කටයුතු අමාත්යාංශයේ ලේකම් රුද්රේන්ද්ර ටැන්ඩන් දෙරට අතර පවතින අන්යෝන්ය උනන්දුව පිළිබඳව කරුණු පැහැදිලි කළේය.
රොයිටර් පුවත් සේවය වාර්තා කරන පරිදි ඔහු පවසා ඇත්තේ වෙනිසියුලාවේ රජය ඉන්දියාව සමඟ දැඩි හවුල්කාරිත්වයක් අපේක්ෂා කරන, ඉතා හිතකාමී රජයක් බවයි.
ඔවුන් සාම්ප්රදායිකවම සමීපතම මිතුරෙක් බව ද ඔහු පැවසුවේය.
වෙනිසියුලානු ජනාධිපතිනියගේ මෙම සංචාරයට ඉන්දියාවේ ප්රමුඛ පෙළේ තෙල් පිරිපහදු මධ්යස්ථාන නිරීක්ෂණය කිරීම සහ මුම්බායි හිදී එරට බලශක්ති ක්ෂේත්රයේ ප්රමුඛ පෙළේ ව්යාපාරික නායකයන් හමුවීම ද ඇතුළත් වේ.
ලොව තෙවැනි විශාලතම තෙල් ආනයනකරුවා වන ඉන්දියාව, හෝමුස් සමුද්ර සන්ධිය වසා දැමීම හේතුවෙන් ගල්ෆ් කලාපයෙන් තමන්ට සාම්ප්රදායිකව ලැබෙන තෙල් සැපයුම දැඩි ලෙස අඩාල වීම නිසා මෙම තීරණාත්මක පියවර ගෙන ඇත.
මේ වන විට ඉන්දියාව වෙනිසියුලාවෙන් බොරතෙල් ආනයනය කිරීම සීඝ්රයෙන් ඉහළ නංවා තිබේ.
