මාර්තු 4 වැනි දින ශ්‍රී ලංකාවේ දකුණු වෙරළට ඔබ්බෙන් හදිසි අවස්ථාවකට මුහුණ දුන් ඉරාන යුද නෞකාවක් වන IRIS Dena වෙතින් ලැබුණු ආපදා ඇමතුමකට ප්‍රතිචාර දැක්වූ බව නිවේදනයක් නිකුත් කරමින් ඉන්දීය නාවික හමුදාව පවසයි.

ඉන්දියානු නාවික හමුදාවට අනුව, කොළඹ සමුද්‍රීය ගලවාගැනීමේ සම්බන්ධීකරණ මධ්‍යස්ථානයට (MRCC) මාර්තු 4 වැනි දින අලුයම ආපදා ඇමතුම ලැබුණේ, ශ්‍රී ලංකාවේ සෝදිසි කිරීමේ සහ මුදාගැනීමේ කලාපය තුළ, එනම්, ගාලේ සිට නාවික සැතපුම් 20ක් පමණ බටහිරින් යාත්‍රාව ස්ථානගතව සිටියදී එම යාත්‍රාව ගැටළුවක් වාර්තා කිරීමෙන් පසුවය.

අනතුරු ඇඟවීමෙන් පසුව, ශ්‍රී ලංකා බලධාරීන්ගේ නායකත්වයෙන් යුත් මෙහෙයුම් සඳහා සහාය වීම සඳහා එදිනම පෙ.ව. 10.00 ට පමණ දිගු දුර සමුද්‍ර මුර සංචාර ගුවන් යානයක් යොදවමින් ඉන්දීය නාවික හමුදාව සෝදිසි කිරීමේ සහ ගලවාගැනීමේ සහාය ආරම්භ කර තිබේ. අවශ්‍ය නම් වහාම යෙදවීම සඳහා ගුවනින් හෙළිය හැකි ජීවිතාරක්ෂක පාරුවලින් සමන්විත තවත් ගුවන් යානයක් සූදානම්ව තබා ඇත.

ඒ ආසන්නයේ ක්‍රියාත්මක වූ ඉන්දීය නාවික හමුදාවේ INS තරංගිනි නෞකාව ද සෝදිසි ප්‍රදේශයට යොමුකරන ලද අතර, ගලවා ගැනීමේ කටයුතු සඳහා සහාය වීමට සවස 4.00 ට පමණ පැමිණ තිබේ. ඊට අමතරව, අතුරුදහන් වූ පිරිස් සෙවීමේ කටයුතු ශක්තිමත් කිරීම සඳහා INS ඉක්ෂැක් සමීක්ෂණ නෞකාව කොචි සිට පැමිණ තිබේ.

මානුෂීය ආධාරවල කොටසක් ලෙස සෙවීමේ සහ ගලවා ගැනීමේ කටයුතු සම්බන්ධයෙන් ශ්‍රී ලංකා බලධාරීන් සමඟ සම්බන්ධීකරණය අඛණ්ඩව සිදුවන බව ඉන්දීය නාවික හමුදාව පවසයි.