ඉන්දියාවේ මෙවර අයවැය මඟින් සඳුදා සිට ක්‍රියාත්මක වන පරිදි සතුන් සහ පක්ෂීන් ආනයනය සඳහා 30% ක රේගු බද්දක් හඳුන්වා දී තිබේ.

ඉන්දීය ජනමාධ්‍ය වාර්තා කළේ එය ආසියාවේ ධනවත්ම මිනිසා වන මුකේෂ් අම්බානිගේ පවුල විසින් පවත්වාගෙන යනු ලබන එරට ප්‍රමුඛතම සත්වෝද්‍යානයේ වියදම් ඉහළ නැංවීමේ පියවරක් වනු ඇති බවයි.

බටහිර ගුජරාට් ප්‍රාන්තයේ පිහිටි සත්ව විශේෂ 2,000 ක් පමණ වාසය කරන අක්කර 3,500 වන්තරා සත්වෝද්‍යානය අම්බානි පවුල විසින් පවත්වාගෙන යනු ලැබේ.

ජනමාධ්‍ය වාර්තා අනුව ඉන්දියාවේ රජයට අයත් හෝ වෙනත් කිසිඳු සත්වෝද්‍යානයක් ඔවුන්ට සමාන පරිමාණයෙන් සතුන් ආනයනය නොකරයි.

රොයිටර් වාර්තාවකට අනුව 2022 සිට, එම සත්වෝද්‍යානය දකුණු අප්‍රිකාව, එක්සත් අරාබි එමීර් රාජ්‍යය සහ වෙනිසියුලාව වැනි රටවලින් චීටා, රයිනෝසිරස් සහ උරගයින් වැනි සතුන් ආනයනය කර ඇත.

එවැනි ආනයන සඳහා පවතින තීරුබදු නිදහස් කිරීම ඉවත්කිරීමට ගත් තීරණයට රජය කිසිදු සාධාරණීකරණයක් ලබා දී නොමැති අතර, අම්බානි පවුල ද මේ දක්වා මේ සම්බන්ධයෙන් ප්‍රතිචාර දක්වා නැතැයි වාර්තා වේ.