ශ්‍රී ලංකාවේ ක්‍රියාත්මක ‘සාගර් බන්ධු’ මෙහෙයුම යටතේ, ‘දිත්වා’ සුළි කුණාටුවෙන් පසු ශ්‍රී ලංකාවේ සිරවී සිටි ඉන්දීය ජාතිකයින් 750ක් පමණ ඉන්දියාව විසින් ඉවත් කරගෙන ඇත.

වාණිජ ගුවන් සේවා සහ ඉන්දීය ගුවන් හමුදා ගුවන් ගමන් හරහා ඉවත් කිරීම් අඛණ්ඩව සිදුවන බව කොළඹ ඉන්දීය මහකොමසාරිස් කාර්යාලය පැවසීය.

ඉවත් කිරීම්වලට අමතරව, දැඩි ගංවතුර සහ නායයෑම්වලින් පීඩාවට පත් පවුල්වලට උපකාර කිරීම සඳහා ඉන්දියාව සෙවීම්, ගලවා ගැනීමේ සහ සහන මෙහෙයුම් තීව්‍ර කර ඇත.

පෙරේදා (29) INS වික්‍රාන්ට් නෞකාවේ චෙතක් හෙලිකොප්ටර් යානා මගින් අතරමං වූ පුද්ගලයින් ආරක්ෂිත ස්ථාන වෙත ගෙනගොස් ඇති අතර, ඊයේ (30) ඉන්දියානු ගුවන් හමුදාවේ MI-17 හෙලිකොප්ටර් යානා මගින් ප්‍රවේශ විය නොහැකි කොත්මලේ ප්‍රදේශය අසල ගලවාගැනීමේ මෙහෙයුම් සිදුකර තිබේ.

එහිදී ගර්භනී කාන්තාවන්, ළදරුවන්, බරපතල තුවාල ලැබූ පුද්ගලයින් සහ විවිධ රටවලින් පැමිණි පුරවැසියන් බේරාගෙන ඇත.

හෙලිකොප්ටර් යානා මගින් කොළඹට තුවාල ලැබූවන් ප්‍රවාහනය කළ අතර ශ්‍රී ලංකා හමුදා නිලධාරීන් නායයෑම්වලින් පීඩාවට පත් ප්‍රදේශවලට ගෙනගොස් තිබේ.

ඉන්දියාවේ විශේෂිත ආපදා ප්‍රතිචාර ඒජන්සිය වන ජාතික ආපදා ප්‍රතිචාර බලකායේ (NDRF) කණ්ඩායම් කොළඹට පැමිණ ගලවාගැනීමේ මෙහෙයුම් සිදුකරමින් සිටී.

ඔවුන් දැන් පුත්තලම සහ බදුල්ලේ දැඩි ලෙස බලපෑමට ලක් වූ ප්‍රදේශවල සේවය කරමින් සිටින අතර, බලපෑමට ලක් වූ පවුල්වලට සහාය වීම සහ ඔවුන්ගේ ක්ෂණික ආරක්ෂාව සහතික කරයි.