October 4, 2024
ආන්දෝලනාත්මක බැඳුම්කර මගඩියේදී නීතිමය ක්‍රියාමාර්ගවලට අදාළව රනිල් වික්‍රමසිංහ ජනාධිපති මුක්තිය පැතූ බවට කැබිනට් ප්‍රකාශක විජිත හේරත් කළ ප්‍රකාශ ප්‍රතික්ෂේප කරන බව හිටපු ජනාධිපති රනිල් වික්‍රමසිංහගේ ප්‍රකාශකයෙක් ප්‍රකාශ කරයි.
හිටපු ජනාධිපති මාධ්‍ය අධ්‍යක්ෂ ධනුෂ්ක රාමනායක නිවේදනයක් නිකුත් කරමින් කියා සිටියේ හිටපු ජනාධිපති රනිල් වික්‍රමසිංහට මුක්තිය ලබාගැනීමට කිසිදු හේතුවක් නොතිබූ බවත් ඇත්ත වශයෙන්ම එවැනි ඉල්ලීමක් කිසිවිටෙක සිදුකර නොමැති බවත්ය.
හිටපු ජනාධිපති වික්‍රමසිංහ මෙම නඩුවේ සාක්ෂිකරුවකු ලෙස හෝ නම්කර නොමැති බවද ඔහු කියාසිටියි.
මහබැංකු බැඳුම්කර මගඩිය සම්බන්ධයෙන් නීතිමය කටයුතු ආරම්භ කර ඇති බව පවසමින් කැබිනට් ප්‍රකාශක අමාත්‍ය හේරත් මීට පෙර ප්‍රකාශ කළේ, හිටපු ජනාධිපති වික්‍රමසිංහගේ මුක්තිය හේතුවෙන් නීතිමය කටයුතු මීට පෙර ඇණහිට තිබූ බවයි.
කෙසේවෙතත්, ධනුෂ්ක රාමනායක එම ප්‍රකාශ ප්‍රතික්ෂේප කරන අතර, එම ප්‍රකාශය හිතාමතා හෝ නොදැනුවත්ව ජනමාධ්‍ය ඇතුළු සමස්ත ජනතාව නොමඟ යවන බව පවසයි.
එම චෝදනාව සම්බන්ධයෙන් සොයාබැලීමට පත්කළ ජනාධිපති කොමිසම පසුව ජනාධිපති වික්‍රමසිංහ නිදහස් කළ බවද ඔහු කියාසිටියි.
“මෙම සන්දර්භය තුළ, වගකිවයුතු අමාත්‍යවරයෙකු සහ කැබිනට් ප්‍රකාශකයෙකු ලෙස, දැනුවත්ව හෝ නොදැනුවත්ව අසත්‍ය ප්‍රකාශ කිරීම නුසුදුසු බව මම ඔබට කාරුණිකව දන්වා සිටිමි,” ධනුෂ්ක රාමනායක වැඩිදුරටත් පවසයි.
