July 30, 2023
ව්‍යාජ විදේශ ගමන් බලපත්‍ර භාවිත කරමින් විදේශ රැකියා සඳහා පුද්ගලයන්ට විදේශගත වීමට ආධාර කළ බවට චෝදනා ලැබූ ආගමන විගමන දෙපාර්තමේන්තුවේ නිලධාරියෙක් අත්අඩංගුවට ගෙන ඇත.
එම නිලධාරියා විසින් ඉන්දීය වීසා සහ ගුවන් ටිකට්පත් පෙන්වා ශ්‍රී ලංකා විදේශ සේවා නියුක්ති කාර්යාංශයේ (SLBFE) නිලධාරීන් නොමඟ යවමින් සංචාරක වීසා බලපත්‍රයකින් ඕමානයට යෑමට උත්සාහ කළ කාන්තාවක් කැටුව ගොස් තිබේ.
කටුනායක ගුවන් තොටුපළේ ගුවන් යානා කිහිපයක් එකවර පිටත්ව යන කාර්ය බහුල අවස්ථාවක මෙම සිදුවීම සිදුව ඇති බව වාර්තා වේ.
ශ්‍රී ලංකා විදේශ සේවා නියුක්ති කාර්යාංශයේ නිලධාරීන්ට එම නිලධාරියා විසින් අදාළ කාන්තාව තම ඥාතිවරියක ලෙස හඳුන්වා දී ඇති අතර, ඇයගේ ඉන්දියාවට යෑමට අවශ්‍ය ගමන් ලියකියවිලි කඩිනමින් අනුමත කරන ලෙස ඉල්ලා ඇත.
සංචාරක ලියකියවිලි අනුමත කිරීමෙන් පසු ශ්‍රී ලංකා විදේශ සේවා නියුක්ති කාර්යාංශයේ නිලධාරීන්ට ඇතිවූ සැකයක් මත ඔවුන් අත්අඩංගුවට ගෙන තිබේ.
අදාළ කාන්තාව ඉන්දියාවට යෑමට අනුමැතිය ලබාගෙන සිටියදී සංචාරක වීසා සහ ඕමාන ප්‍රවේශ පත්‍රයක් සන්තකයේ තබාගැනීම මෙම සැකයට හේතුවී ඇත.
ඕමානයට ගෘහ සේවිකාවන් ලෙස සංක්‍රමණික ශ්‍රමිකයන් යැවීම ශ්‍රී ලංකාව නතර කර ඇති අවස්ථාවක, සංචාරක වීසා බලපත්‍රයක් භාවිත කරමින් නීතිවිරෝධී ලෙස මෙරට කාන්තාවන් රැකියා සඳහා ඕමානයට යැවීමේ ජාවාරමේ ප්‍රධාන කොටස්කරුවෙක් ලෙස මෙම නිලධාරියා කටයුතු කර ඇති බව වාර්තා වේ.
ආගමන විගමන දෙපාර්තමේන්තු නිලධාරියා සහ සැකකාර කාන්තාව මීගමුව මහේස්ත්‍රාත් අධිකරණයට ඉදිරිපත් කිරීමෙන් අනතුරුව එම නිලධාරියා රක්ෂිත බන්ධනාගාර ගත කර ඇති අතර, රුපියල් 7,500ක සහ රුපියල් 25,000ක ශරීර ඇප දෙකක් මත කාන්තාව මුදා හැර තිබේ.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව වැඩිදුර පරීක්ෂණ පවත්වයි.
