May 22, 2026
ශ්රී ලංකාවේ ආර්ථික ප්රතිසංස්කරණ වැඩපිළිවෙළ ඉදිරියටම ගමන් කරමින් පවතින අතර, අන්තර්ජාතික මූල්ය අරමුදලේ (IMF) ආසියා-පැසිෆික් දෙපාර්තමේන්තුවේ අධ්යක්ෂ ක්රිෂ්ණා ශ්රීනිවාසන් පවසන්නේ, විස්තීර්ණ අරමුදල් පහසුකම (EFF) යටතේ සිදුකෙරෙන පස්වැනි සහ හයවැනි සමාලෝචන ලබන සතියේදී IMF විධායක මණ්ඩලය විසින් සලකා බැලීමට නියමිත බවයි.
සමාජ මාධ්ය ඔස්සේ ප්රකාශයක් කරමින් ශ්රීනිවාසන් සඳහන් කරන්නේ, පසුගිය වසර කිහිපය තුළ ශ්රී ලංකා බලධාරීන් සාර්ව ආර්ථික ස්ථාවරත්වය ඇති කිරීමට, විදේශ විනිමය සංචිත නැවත ගොඩනැඟීමට සහ විශ්වාසය ශක්තිමත් කිරීමට “සුවිශේෂී ප්රගතියක්” ලබා ඇති බවයි.
මෙම ප්රයත්නයන් මහජනතාව, ආයෝජකයන් සහ අනෙකුත් පාර්ශ්වයන් විසින් ද අගය කර ඇති අතර, එමඟින් ආර්ථිකය වඩාත් ශක්තිමත් පදනමකට පැමිණ ඇති බව ද ඔහු පවසයි.
කෙසේවෙතත්, මෑතකාලීන ගෝලීය වර්ධනයන් හේතුවෙන් ලෝකයේ බොහෝ රටවල් මුහුණදෙන ආකාරයේ නව ආර්ථික පීඩනයන් ශ්රී ලංකාවට ද ඇති වී තිබෙන බව ඔහු පෙන්වාදෙයි.
“මෙවැනි ගෝලීය අභියෝගවලට මුහුණදීම කිසිසේත්ම පහසු නැහැ. එහෙත් අතීතයට වඩා වර්තමානයේ ශ්රී ලංකාවේ ප්රතිපත්තිමය රාමුව බොහෝ සෙයින් ශක්තිමත්,” යැයි ඔහු පෙන්වාදෙයි. එමෙන්ම, මෙම ප්රගතිය අඛණ්ඩව පවත්වාගෙන යෑම සඳහා ස්ථාවර ප්රතිපත්තිමය මඟපෙන්වීමක් පවත්වා ගැනීම සහ වෙනස්වන තත්ත්වයන්ට අනුව හැඩගැසීමට ආර්ථිකයට ඉඩදීම අත්යවශ්ය වන බව ද ඔහු අවධාරණය කරයි.
ප්රතිසංස්කරණ වැඩපිළිවෙළ ඉදිරියට යන විට, ශ්රී ලංකා බලධාරීන් සමඟ අඛණ්ඩව සහ සමීපව කටයුතු කිරීමට IMF ආයතනය බලාපොරොත්තු වන බව ද ශ්රීනිවාසන් වැඩිදුරටත් ප්රකාශ කරයි.
