ජාත්‍යන්තර මූල්‍ය අරමුදලේ විධායක මණ්ඩලය විසින් ශ්‍රී ලංකාව සඳහා වන විස්තීර්ණ අරමුදල් පහසුකම යටතේ පවත්වනු ලැබූ ඒකාබද්ධ පස්වන සහ හයවන සමාලෝචන සාර්ථකව නිම කර ඇත.

මේ අනුව, රටේ ආර්ථික ප්‍රතිපත්ති සහ ප්‍රතිසංස්කරණ සඳහා සහය වීම පිණිස ඇමරිකානු ඩොලර් මිලියන 695ක පමණ මුදලක් වහාම ලබා ගැනීමට ශ්‍රී ලංකාවට අවස්ථාව හිමි වේ.

මාස 48ක කාලසීමාවක් සඳහා වන මෙම විස්තීර්ණ අරමුදල් පහසුකම යටතේ ක්‍රියාත්මක ශ්‍රී ලංකාවේ ආර්ථික ප්‍රතිසංස්කරණ වැඩසටහනෙහි පස්වන සහ හයවන ඒකාබද්ධ සමාලෝචන IMF විසින් මෙලෙස අවසන් කරන ලදී.

නිවේදනයක් නිකුත් කරමින් ඔවුන් පවසන්නේ, මෙම ඒකාබද්ධ සමාලෝචන නිම කිරීමත් සමඟ හිමිවන මුදල ද ඇතුළුව, මේ දක්වා මෙම වැඩසටහන යටතේ ශ්‍රී ලංකාව ලබාගෙන ඇති මුළු මුදල ඇමරිකානු ඩොලර් බිලියන 2.4ක් පමණ වන බවයි.

ශ්‍රී ලංකාව සඳහා වන මෙම වැඩසටහන 2023 මාර්තු 20 වන දින IMF විධායක මණ්ඩලය විසින් අනුමත කරන ලද්දේ ඇමරිකානු ඩොලර් බිලියන 3කට ආසන්න මුදලක උපරිමයකට යටත් වෙමිනි.

මෙම වැඩසටහන මඟින් ශ්‍රී ලංකාවේ ආර්ථිකය තුළ දිගුකාලීන සාර්ව ආර්ථික ස්ථාවරත්වයක් නැවත ඇති කිරීම සඳහා පහත සඳහන් ප්‍රධාන අරමුණු වෙනුවෙන් සහයෝගය දක්වයි:

අවදානමට ලක්විය හැකි පොදු ජනතාව ආරක්ෂා කරන අතරතුර, මූල්‍ය සහ ණය තිරසාරභාවය නැවත ඇති කිරීම.

මිල මට්ටම් සහ මූල්‍ය ක්ෂේත්‍රයේ ස්ථාවරත්වය සුරක්ෂිත කිරීම.

බාහිර මූල්‍ය සංචිත නැවත ගොඩනැගීම.

රාජ්‍ය පාලනය ශක්තිමත් කිරීම සහ දූෂණ අවදානම් අවම කිරීම.

ආර්ථික වර්ධනය ඉලක්ක කරගත් ව්‍යුහාත්මක ප්‍රතිසංස්කරණ ඉදිරියට රැගෙන යාම.

විධායක මණ්ඩල සාකච්ඡාවෙන් අනතුරුව, ජාත්‍යන්තර මූල්‍ය අරමුදලේ නියෝජ්‍ය කළමනාකාර අධ්‍යක්ෂ සහ වැඩබලන සභාපති කෙන්ජි ඔකමුරා විසින් පහත සඳහන් ප්‍රකාශය නිකුත් කරන ලදී:

“අභියෝගාත්මක තත්ත්වයන් මධ්‍යයේ වුවද, විස්තීර්ණ අරමුදල් පහසුකම යටතේ ශ්‍රී ලංකාව දක්වන ශක්තිමත් කැපවීම සහ ක්‍රියාත්මක කිරීම් අඛණ්ඩව සිදුවෙමින් පවතී. මෙම ආර්ථික ප්‍රතිසංස්කරණ වැඩසටහනෙන් ලැබුණු ප්‍රතිලාභ හේතුවෙන් රටේ ආර්ථික ඔරොත්තු දීමේ හැකියාව රැක ගැනීමට හැකි වූ අතර, දිට්වා සුළි කුණාටුවෙන් සහ මැදපෙරදිග යුද්ධයෙන් එල්ල වූ බලපෑම්වලට මුහුණ දීමට ද ඉන් ඉඩකඩ සැලසුණි. කෙසේ වෙතත්, මැදපෙරදිග යුද තත්ත්වය හේතුවෙන් ශ්‍රී ලංකාවේ ඉදිරි ආර්ථික දැක්ම සැලකිය යුතු ලෙස අයහපත් වී ඇති අතර, අවදානම් තත්ත්වයන් තවදුරටත් ඉහළ ගොස් ඇත.”