පසුගිය වසර පුරා සිදුකරන ලද ගැඹුරු සමාලෝචනයකින් සහ ප්‍රධාන කොටස්කරුවන් සමඟ පුළුල් ලෙස සම්බන්ධ වීමෙන් පසුව, ජාත්‍යන්තර ක්‍රිකට් කවුන්සිලය අමෙරිකා එක්සත් ජනපද ක්‍රිකට් ආයතනයේ ICC සාමාජිකත්වය වහාම ක්‍රියාත්මක වන පරිදි අත්හිටුවීම තහවුරු කළේය.

මීට පෙර පැවති රැස්වීමේදී අන්තර්ජාතික ක්‍රිකට් කවුන්සිලය විසින් ගනු ලැබූ මෙම තීරණයට පදනම් වූයේ, ICC ව්‍යවස්ථාව යටතේ ICC සාමාජිකයකු ලෙස අමෙරිකා එක්සත් ජනපද ක්‍රිකට් ආයතනය සිය බැඳීම් නැවත නැවතත් සහ අඛණ්ඩව උල්ලංඝනය කිරීම බව පැවසේ.

ක්‍රියාකාරී පාලන ව්‍යුහයක් ක්‍රියාත්මක කිරීමට අපොහොසත් වීම, එක්සත් ජනපද ඔලිම්පික් සහ පැරාලිම්පික් කමිටුව (USOPC) සමඟ ජාතික පාලක මණ්ඩලයේ තත්ත්වය ලබාගැනීම සඳහා ප්‍රගතියක් නොමැතිකම සහ එක්සත් ජනපදයේ සහ ලොව පුරා ක්‍රිකට් ක්‍රීඩාවට කීර්තිනාමයට හානිකිරීමට හේතු වූ සැලකිය යුතු ක්‍රියාමාර්ග මෙයට ඇතුළත් වන නමුත් අත්හිටුවීම ඒවාට පමණක් සීමානොවන බව ද අන්තර්ජාතික ක්‍රිකට් කවුන්සිලය පවසයි.

මෙම අත්හිටුවීම අවාසනාවන්ත වන නමුත් ක්‍රීඩාවේ දිගුකාලීන අවශ්‍යතා ආරක්ෂා කිරීම සඳහා අවශ්‍ය පියවරක් වන අතර, අත්හිටුවීම හේතුවෙන් ක්‍රීඩක ක්‍රීඩිකාවන්ට සහ ක්‍රීඩාවටම බලපෑමක් නොවන බව සහතික කිරීම අන්තර්ජාතික ක්‍රිකට් කවුන්සිලයේ ප්‍රමුඛතාවයි.

ලොස් ඇන්ජලීස් 2028 ඔලිම්පික් ක්‍රීඩා උළෙල (LA28) සඳහා සූදානම් කිරීම් ඇතුළුව ICC ඉසව්වලට සහභාගී වීමේ අයිතිය ඇමරිකා එක්සත් ජනපදයේ ජාතික කණ්ඩායම් රඳවාගනු ඇතැයි ICC මණ්ඩලය තීරණය කර ඇත.

ක්‍රීඩකයන්ට අඛණ්ඩ සහයෝගය සහතික කිරීම සහ ඔලිම්පික් ඇතුළත් කිරීම සඳහා ගම්‍යතාව පවත්වා ගැනීම සඳහා ඇමරිකා එක්සත් ජනපද ජාතික කණ්ඩායම්වල කළමනාකරණය සහ පරිපාලනය තාවකාලිකව ICC සහ/හෝ එහි නම් කරන ලද නියෝජිතයින් විසින් අධීක්ෂණය කරනු ලැබේ.

මෙම ප්‍රවේශය ඇමරිකා එක්සත් ජනපදයේ ක්‍රිකට් ක්‍රීඩකයන්ගේ අවශ්‍යතා ආරක්ෂා කිරීම සහ ඇමරිකා එක්සත් ජනපදය නියෝජනය කරන ක්‍රීඩකයන්ගේ තත්ත්වය සහ හැකියාවන් ඉහළ නැංවීමට උත්සාහ කරන ඉහළ කාර්යසාධනයක් සහ ක්‍රීඩක සංවර්ධන වැඩසටහනක පැවැත්ම සඳහා අන්තර්ජාතික ක්‍රිකට් කවුන්සිලයේ දැඩි කැපවීම පිළිබිඹු කරයි.