දුරකතන සංවාදයක් අතරතුර වෘත්තීය සමිති සාමාජිකයකුට තර්ජනය කළ බවට පළවන වාර්තා තරයේ ප්‍රතික්ෂේප කරන බව කඩුවෙල නගරාධිපති සහ ලංකා විදුලිබල මණ්ඩලයේ හිටපු වෘත්තීය සමිති නායක රන්ජන් ජයලාල් පවසයි.

ජනමාධ්‍ය ඔස්සේ ප්‍රචාරය වූ ඔහු සහ වෘත්තීය සමිති සාමාජිකයකු අතර සිදුවූ බව පැවසෙන එම දුරකථන සංවාදයකදී ඝාතන සම්බන්ධයෙන් සිදුකළ බවට කරන ප්‍රකාශ ප්‍රතික්ෂේප කරන රන්ජන් ජයලාල් පවසන්නේ, එම ප්‍රකාශය සත්‍යයෙන් තොර බවත්, එය සංස්කරණය කර ඇති බවත් ය.

රන්ජන් ජයලාල් සහ වෘත්තීය සමිති සාමාජිකයකු අතර ලංකා විදුලිබල මණ්ඩලයේ පවතින ප්‍රතිව්‍යුහගතකරණය කිරීමේ සැලසුම් සම්බන්ධයෙන් සිදුවූ බව කියන උණුසුම් වචන හුවමාරුවක හඬපටයක් විදුලි සේවක සංගමය විසින් නිකුත් කර තිබිණි.

එම හඬපටයේ රන්ජන් ජයලාල් “අපි මරන්න බයත් නෑ, මැරෙන්න බයත් නෑ, ලක්ෂයක් මරලා හරි අපි මේ රට බේරගන්නවා” යනුවෙන් පවසනු ඇසෙන්නට තිබේ.

ඔහුගේ මෙම ප්‍රකාශය තරයේ හෙළාදකින බව පැවසන ලංකා විදුලිබල මණ්ඩලයේ ජාතික සේවක සංගමයේ ලේකම් අජිත් දේවප්‍රියගේ පැවසුවේ, වරක් කම්කරු අයිතීන් වෙනුවෙන් පෙනීසිටි නායකයකුගෙන් එවැනි ප්‍රකාශයක් පිළිගත නොහැකි බවයි.

මෙයට ප්‍රතිචාර දක්වමින් රන්ජන් ජයලාල් කියාසිටියේ, තමා කිසිවකුට මරණ තර්ජන නොකළ බවයි.

තමන් සිදුකළ එම ප්‍රකාශය ඇමතුම අතරතුර තමාට එල්ල වූ තර්ජනවලට ප්‍රතිචාරයක් බවත් ඔහු අවධාරණය කළේය.

“මම කිව්වේ මැරෙන්න හෝ තර්ජනවලට මුහුණ දෙන්න බය නැහැ කියන එකයි. ඒ කොටස මම ප්‍රචණ්ඩත්වයට කතා කරනවා වගේ පේන්න සමහර මාධ්‍ය විසින් සංස්කරණය කර තිබෙනවා” ඔහු පැවසීය.