June 28, 2024
කොළඹ දිස්ත්‍රික් හිටපු පාර්ලිමේන්තු මන්ත්‍රීනී හිරුණිකා ප්‍රේමචන්ද්‍ර ඩිෆෙන්ඩර් රථයක් යොදාගෙන තරුණයෙකු පැහැරගෙන යෑමේ සිද්ධියට වරදකාරිය වූ අතර ඇයට කොළඹ මහාධිකරණය අද වසර තුනක සිර දඬුවමක් නියම කළේය.
කොළඹ මහාධිකරණ විනිසුරු අමල් රණරාජා හිරුණිකා ප්‍රේමචන්ද්‍රට වසර තුනක සිර දඬුවමක් නියම කළේ එම වරදවල බරපතළකම සැලකිල්ලට ගෙනය.
2015 දෙසැම්බර් 21 වැනිදා කළු පැහැති ඩිෆෙන්ඩර් ජීප් රථයකින් දෙමටගොඩ ප්‍රදේශයට පැමිණි පිරිසක් තමා පැහැරගෙන ගොස් පහර දුන් බව ඔහුගේ නඩුවේදී පැමිණිලිකරු චෝදනා කර තිබිණි.
මීට පෙර අවස්ථාවකදී පැහැර ගැනීමට සම්බන්ධ බවට වරද පිළිගත් තවත් විත්තිකරුවන් අටදෙනකුට කොළඹ මහාධිකරණය විසින් අත්හිටවූ සිරදඬුවම් නියම කර තිබිණි.
කෙසේවෙතත් මෙම නඩුවේ විත්තිකරුවන් අතරින් නිර්දෝෂීභාවය පවත්වාගෙන ගියේ හිටපු පාර්ලිමේන්තු මන්ත්‍රීනී හිරුණිකා ප්‍රේමචන්ද්‍ර පමණකි.
මීට පෙර ප්‍රකාශයක් කරමින් ප්‍රේමචන්ද්‍ර අධිකරණයට දන්වා සිටියේ සිද්ධිය වූ බව කියන දිනයේ ඇය වෙනත් උත්සවයකට සහභාගී වීමට පෙර හිටපු ඇමැති රාජිත සේනාරත්න සමඟ සාකච්ඡාවක් පැවැත්වූ බවයි.
සිද්ධිය වන අවස්ථාවේ තමන් එම උත්සවයේ සිටි බවත් අධිකරණය හමුවේ වරද පිළිගත් එක් විත්තිකරුවෙකු ඇයගේ අවසරයකින් තොරව තම ඩිෆෙන්ඩර් රථය අල්ලාගෙන එම සිද්ධියට යොදාගත් බවත් ඇය වැඩිදුරටත් පවසා තිබිණි.
