මධ්‍යම කඳුකරයේ ජල පෝෂක ප්‍රදේශවලට ඇදහැළෙන අධික වර්ෂාපතනය හේතුවෙන් විමලසුරේන්ද්‍ර ජලාශය අද උදෑසන සිට වාන්දැමීමට පටන් ගත් බව වාරිමාර්ග දෙපාර්තමේන්තුව පවසයි.

මධ්‍යම කඳුකරයේ බටහිර බෑවුම් ප්‍රදේශවලට ඊයේ (24) රාත්‍රියේ සිට අධික වර්ෂාපතනයක් ලැබී තිබේ.

මේ අතර කාසල්රි සහ මාවුස්සාකැලේ ජලාශවල ජල මට්ටම ද පිටාර මට්ටමට ළඟාවෙමින් පවතින බව වාර්තා වේ.

මධ්‍යම කඳුකරයට එලෙස වර්ෂාපතනයක් ලැබී තිබුණ ද කිළිනොච්චිය ආශ්‍රිත ප්‍රදේශවල පවතින නියඟය හේතුවෙන් පවුල් 432කට අයත් පුද්ගලයන් 946 දෙනෙකු පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.

උතුරු පළාතේ කිළිනොච්චිය දිස්ත්‍රික්කයේ කරච්චි ප්‍රාදේශීය ලේකම් කොට්ඨාසයේ ජනතාව පීඩාවට පත්ව ඇති බව එම මධ්‍යස්ථානය පෙන්වාදෙයි.

කෙසේවෙතත් නියඟය හේතුවෙන් ජීවිත හානි කිසිවක් වාර්තා වී නැත.

නියඟය පවතින ප්‍රදේශවලට පානීය ජලය බෙදාහැරීමට පියවර ගෙන ඇති බව ද වාර්තා වේ.