July 29, 2026
ශ්රේෂ්ඨාධිකරණ සහ අභියාචනාධිකරණ විනිසුරුවරුන්ගේ විශ්රාම යෑමේ වයස් සීමාව දීර්ඝ කිරීමට රජය ගෙන ඇති යෝජනාව සම්බන්ධයෙන් ජාතික ජන බලවේගය තුළ මතභේද සහ බෙදීම් පවතින බවට පැතිර යන ප්රකාශ අධිකරණ අමාත්ය හර්ෂණ නානායක්කාර ප්රතික්ෂේප කළේය.
ජාතික ජන බලවේගයට සම්බන්ධ ජ්යෙෂ්ඨ නීතිඥ ලාල් විජේනායක මෑතකදී කළ ප්රකාශවලට ප්රතිචාර දක්වමින්, කැබිනට් තීරණ දැනුම්දීමේ ජනමාධ්ය හමුවට එක්වූ අමාත්යවරයා සඳහන් කළේ, ලාල් විජේනායක අභ්යන්තර සාකච්ඡාවලදී මෙම යෝජනාවට සිය විරෝධය පළකළ බවත්, ඒ පිළිබඳ තම අදහස් ලිඛිතව පවා ඉදිරිපත් කළ බවත්ය.
ලාල් විජේනායකට නිහඬ වන ලෙස දැනුම්දුන් බවට කෙරෙන ප්රකාශ ද අමාත්යවරයා බැහැර කළ අතර, අදාළ සාකච්ඡාව පැවැති අවස්ථාවේදී තමා ද එහි සිටි බවත්, එම ජ්යෙෂ්ඨ නීතිඥවරයාට සිය අදහස් ප්රකාශ කිරීමට කිසිවකුගෙන් තහංචියක් නොවූ බවත් හෙතෙම පැවසීය.
ප්රජාතන්ත්රවාදී ක්රියාවලියක් තුළ විවිධ මත පැවතීම සාමාන්ය දෙයක් බව පෙන්වාදුන් අමාත්යවරයා, අභ්යන්තර සාකච්ඡාවලින් අනතුරුව ආණ්ඩුව මෙම සාමූහික තීරණයට එළඹි බව අවධාරණය කළේය.
විනිසුරුවරුන්ගේ විශ්රාම වයස දීර්ඝ කිරීමේ යෝජනාව ඉදිරිපත් කරන ලද්දේ, නඩු විභාග කිරීමේ ක්රියාවලිය කඩිනම් කිරීමට, අධිකරණවල ගොඩගැසී ඇති නඩු සංඛ්යාව අඩු කිරීමට සහ අධිකරණ පද්ධතිය කෙරෙහි මහජන විශ්වාසය තවදුරටත් තහවුරු කිරීමට බව ඇමැතිවරයා පෙන්වාදුන්නේය.
මෙම යෝජනාව සම්බන්ධයෙන් ජාතික ජන බලවේගය තුළ දෙදරා යෑමක් ඇති වී තිබෙන බවට කෙරෙන මත පළකිරීම් අමාත්ය නානායක්කාර තරයේ ප්රතික්ෂේප කළේය. පක්ෂය සැමවිටම සිය ප්රතිපත්තිමය රාමුව තුළ කටයුතු කරන අතර, අදාළ ආණ්ඩුක්රම ව්යවස්ථා සංශෝධනය සමඟ ඉදිරියට යෑමට ආණ්ඩුව පොදු එකඟතාවයකට පැමිණ ඇති බව ඔහු පැවසීය.
පනත් කෙටුම්පත් සහ යෝජනා සම්බන්ධයෙන් පුද්ගලයන්ට විවිධ මත දැරීමට නිදහස තිබුණද, සමස්ත මහජන සුභසිද්ධිය වෙනුවෙන් අවසාන තීරණ ගැනීමේ වගකීම රජය සතු වන බව ද අමාත්යවරයා වැඩිදුරටත් සඳහන් කළේය.
