තෙල් මිල සම්බන්ධයෙන් HSBC හි ප්‍රධාන විධායක නිලධාරියා කළ ප්‍රකාශය වැරදි ලෙස නිරූපණය කිරීමට උත්සාහ කළ බවට විපක්ෂ මන්ත්‍රී හර්ෂ ද සිල්වා රජය සහ ඛනිජ තෙල් සංස්ථා නිලධාරීන්ට චෝදනා කර තිබේ.

මන්ත්‍රීවරයා පවසන්නේ ඔවුන්ගේ ක්‍රියාවන් ‘අතිශයින්ම ලැජ්ජා සහගත’ බවයි.

ශ්‍රී ලංකාව බොරතෙල් බැරලයකට ඇමරිකානු ඩොලර් 286ක් ගෙවන්නට ඇති බවට ප්‍රධාන විධායක නිලධාරියා යෝජනා කළ බව රජය වැරදි ලෙස ප්‍රකාශ කළ බවත්, ඊට එරෙහිව නීතිමය ක්‍රියාමාර්ග ගැනීමට පවා තර්ජනය කළ බවත් ද සිල්වා මන්ත්‍රීවරයා පැවසීය.

ඔහු ඇත්ත වශයෙන්ම සඳහන් කළේ බොරතෙල් නොව පිරිපහදු කළ තෙල් සඳහා වන ‘අවසන් මිල’ (door-to-door price) බවත්, ඔහු කරන ලද්දේ පවතින මැද පෙරදිග යුද්ධයේ ප්‍රතිඵල විශ්ලේෂණය කිරීම පමණක් බවත් මන්ත්‍රීවරයා පැහැදිලි කළේය.

“ආණ්ඩුව විසින් චෝදනා කරන පරිදි, ඔහු පැහැදිලිවම පිරිපහදු කළ තෙල් ගැන සඳහන් කළේ, කිසි විටෙකත් බොරතෙල් නෙවෙයි,” හර්ෂ ද සිල්වා X හි ලිවීය.

‘ඔහුට පාඩමක් ඉගැන්වීමට’ රජය දැරූ උත්සාහය අසාර්ථක වූ බව ද මන්ත්‍රීවරයා පැවසීය.

රක්ෂණ, නැව්ගත කිරීම සහ සැපයුම් සීමාවන් වැනි අමතර වියදම් හේතුවෙන් ආසියානු ගැනුම්කරුවන් සඳහා තෙල් මිල බ්‍රෙන්ට් බොරතෙල් මිණුම් සලකුණුවලට වඩා සැළකිව යුතු ලෙස වැඩි විය හැකි බවට HSBC හි ප්‍රධාන විධායක නිලධාරී ජෝර්ජස් එල්හෙඩරි කළ ප්‍රකාශයන්ට ඛනිජ තෙල් සංස්ථාව කළ ප්‍රතිචාර දැක්වීම ඔහුගේ මෙම අදහස් පළ කිරීමට හේතු වී තිබිණි.

හොංකොං හි ආයෝජන සංසදයකට සහභාගී වෙමින් මිඩ්ල් ඊස්ට් අයි හි වාර්තාවකට අනුව, HSBC හි ප්‍රධාන විධායක නිලධාරි එල්හෙඩරි අදාළ ප්‍රකාශය සිදුකර තිබිණි.

එම ප්‍රකාශයට ප්‍රතිචාර දක්වමින්, ශ්‍රී ලංකාව බොරතෙල් බැරලයකට ඩොලර් 286ක් ගෙවූ බවට කරන ප්‍රකාශ ප්‍රතික්ෂේප කළ ඛනිජ තෙල් නීතිගත සංස්ථාව, එය සාවද්‍ය බවත් එම වාර්තා සම්බන්ධයෙන් නීතිමය ක්‍රියාමාර්ග ගැනීමට අදහස් කරන බවත් පැවසීය.

නිවේදනයක් නිකුත් කරමින් ඛනිජ තෙල් නීතිගත සංස්ථාවේ සභාපතිවරයා පැවසුවේ සංස්ථාව සපුගස්කන්ද පිරිපහදුව සඳහා පමණක් බොරතෙල් ආනයනය කරන නමුත් එය මිලදී ගත් හෝ ගිවිසුම්ගත කර ඇති ඕනෑම බොරතෙල් තොගයක් සඳහා බැරලයකට ඩොලර් 286ක් ගෙවා හෝ ගෙවීමට එකඟ වී හෝ නොමැති බවයි.

සංස්ථාවේ කීර්ති නාමයට හානි කිරීම අරමුණු කරගත් අසත්‍ය ප්‍රකාශ සංස්ථාව තවදුරටත් ප්‍රතික්ෂේප කළ අතර, වැරදි තොරතුරු පතුරුවා හැරීමට වගකිව යුතු පාර්ශ්වයන්ට එරෙහිව නීතිමය ක්‍රියාමාර්ග ගැනීමට අදහස් කරන බවට ද අනතුරු ඇඟවීය.