මෙරටින් විදේශ විනිමය අධික ලෙස පිටතට ගලායෑම වැළැක්වීමේ අරමුණින් වාහන ආනයනය සීමා කිරීම සඳහා රජය සහ ශ්‍රී ලංකා මහ බැංකුව විසින් මෑතකදී හඳුන්වා දුන් ප්‍රතිපත්තිමය පියවර සාර්ථක ප්‍රතිඵල පෙන්වා ඇති බව වෙළෙඳ හා ආයෝජන ප්‍රතිපත්ති දෙපාර්තමේන්තුව පවසයි.

වාහන ආනයනය සඳහා පැනවූ 50%ක තාවකාලික රේගු ආනයන බදු අධිභාරය සහ මහ බැංකුව විසින් වාහන සඳහා ලබාදෙන ණය සහ වටිනාකම අතර අනුපාතය (Loan-to-Value – LTV) සීමා කිරීමට ගත් පියවර හේතුවෙන් මෙලෙස වාහන ආනයනය සැළකිව යුතු ලෙස පහත වැටී ඇති බව එම දෙපාර්තමේන්තුවේ අධ්‍යක්ෂ ජෙනරාල් අයි.ජේ. අබේරත්න සඳහන් කර තිබේ.

විශේෂයෙන්ම බදු අධිභාරයට වඩා මහ බැංකුවේ LTV අනුපාත සංශෝධනය මෙම පහත වැටීමට සෘජුවම බලපා ඇති බව ඇය පෙන්වා දී ඇත.

මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය විසින් 2026 මැයි 16 වැනිදා සිට මාස ත්‍රිත්වයක කාලයක් සඳහා ක්‍රියාත්මක වන පරිදි මගී ප්‍රවාහන බස් රථ, මෝටර් රථ, ත්‍රිපෝද රථ සහ ගොල්ෆ් රථ ඇතුළු වාහන වර්ග කිහිපයකට මෙම 50%ක රේගු බදු අධිභාරය පනවන ලදී.

එම මාස තුනක කාලසීමාවෙන් පසුවද මෙම බදු අධිභාරය දීර්ඝ කරන්නේද යන්න පිළිබඳ රජය විසින් මෙතෙක් අවසන් තීරණයක් ගෙන නොමැති බවද අධ්‍යක්ෂ ජනරාල්වරිය වැඩිදුරටත් සඳහන් කර තිබේ.

මේ අතර, 2026 මැයි 25 වැනිදා සිට ක්‍රියාත්මක වන පරිදි ශ්‍රී ලංකා මහ බැංකුව විසින් වාහන ණය සඳහා පැවැති LTV අනුපාතය සියයට 10කින් පහත හෙළීමට කටයුතු කළේය.

ඒ අනුව, ලියාපදිංචි නොකළ හෝ වසරකට වඩා අඩු කාලයක් භාවිත කළ වාහන සඳහා වන උපරිම LTV අනුපාතය වාණිජ වාහන සඳහා 60% දක්වාද,
මෝටර් රථ, SUV, වෑන් සහ ත්‍රිරෝද රථ සඳහා 40% දක්වාද සීමා කෙරිණි.

මීට අමතරව, රත්රන් ඇපයට තබා ගන්නා ණය පහසුකම් සඳහාද 70%ක උපරිම අනුපාතයක් නියම කිරීමට මහ බැංකුව පියවර ගත්තේය.

ගෝලීය භූ-දේශපාලනික සහ ආර්ථික නොසන්සුන්තාවන් හමුවේ රත්රන් සහ වාහන මිල ගණන්වල සිදුවන උච්චාවචනයන් හේතුවෙන් මුල්‍ය පද්ධතිය තුළ ඇතිවිය හැකි අවදානම් පාලනය කිරීමත්, මූල්‍ය ආයතනවල ස්ථාවරත්වය තහවුරු කිරීමත් මෙම තීරණවල ප්‍රධාන අරමුණ වූ බව ශ්‍රී ලංකා මහ බැංකුව අවධාරණය කරයි.

මුලාශ්‍රය – Sunday Morning